Ba mih madan bad teh lama ïong ka KSU & FKJGP bun kiba khang dukan ha Khliehriat bad Ladrymbai

Khliehriat, Naiwieng 23: Ka jingmih madan ki dkhot jong ka Khasi students Union bad ki dkhot ka Federation of Khasi Jaiñtia and Garo People East Jaiñtia Hills District kiba la pynlong ïa ka jingteh lama ïong ha sorbah Khliehriat, lehse kane ka la pyn ma bad pyn syier ïa ki bar jylla ha kaba kiba bun ki dukan jong ki bar jylla ki don ha Khliehriat bad ha Ladrymbai ki la khang dam lut.
Ha ka jingshisha, ki dkhot jong kitei ki ar seng, ki la pynlong ïa ka jingteh lama ïong da kaba jai jai tang ban pyni ïa ka dak ka jingsngew pyrshah ïa ka jingleh ki pulit Assam kiba la pyniap dusmon ïa ki briew ha shnong Mukroh, hynrei la lap ba kiba bun ki dukan kiba dei jong ki bar jylla ki la shu khang hi khlem da don mano mano ba phah khang, kumjuh ruh la lap ba ka jingwan kiew ki kali na Assam ki duna bha mynta ka sngi.