Shillong, Nohprah 19: Da ka jingsngewkhia halor ki jingbym ïaid beit ki kam, ki samla pule jong ka North-Eastern Hill University (NEHU) Tura Campus ki la pynmih ïa ka jingkyrpad lang ïa Pro Vice-Chancellor (Pro VC) ban iehnoh kam hapoh ka 24 kynta, da kaba pynpaw ba ka don ka kynrum kynram ha ki jingpyniaid kam ha kane ka jaka pule.
La ïathuh ba ïa kane ka jingkyrpad ba la soi da ka NEHUSU, NEHUTA, NEHUNSA, METTA, bad KSU-NEHU Unit, da kaba pynpaw ba ka jingbym don jong u Vice-Chancellor ba treikam manla ka sngi ne ba pura, ka la ktah ïa ki kam jong ka jaka pule, bad ka jingiehnoh kam jong ki nongtrei kiba hakhmat jong kane ka jaka pule.
“Ngi kyrpad lang bad da kaba burom ngi kyrpad ïa phi ba phin aiti noh ïa ka shithi iehnoh kam na ka kam Pro Vice-Chancellor, Tura Campus, na ka bynta ka bha ka miat jong ka University bad kiba don ha kane ka jaka pule,” ong ki shithi ba ki la phah.
Ha ka jingthoh ki union ki la kam ba ki jingpynthikna na ki nongmihkhmat ka Ministry ban pynbeit ïa kine ki jingeh ki khlem pat pyntreikam haduh mynta bad ka jingïai bteng ban trei ïa ka kam da Pro VC kam long shuh kaba bha.
Na ka liang jong ki, ki la ai por haduh 24 kynta ban ïoh ka jubab da kaba byrngem ruh ban ïakhih shuh shuh lada kim ïohpdiang kano kano ka jubab.
“La kyrpad ïaphi ba phin ai ktien ïa ka rai jong phi hapoh 24 kynta naduh ba la ïohpdiang ïa kane ka shithi, bad lada ym lah ban pynlong kam, kan pynbor ïa ki seng ban shim shuh shuh kiwei pat ki sienjam kiba long katkum ki jingïarai lang bad kiba long kongsan katkum ka riti synshar paidbah,” pynpaw shuh shuh ka shithi ba ki la phah.
