Ba mih ka jingïania ha Mawkyrwat Civil Hospital , pynshai ka Medical Superintendent

Mawkyrwat, ‘Nailar 06: Ka Dr. M. Lyngdoh, Medical Superintendent (MS) jong ka Civil Hospital Mawkyrwat, South West Khasi Hills District ka la pynshai halor ka jingjia ha ka 5 tarik mynta u bnai halor ka jingjia ba ka la mih ka jingïaheh ktien jong kawei ka longkmie bad uwei u Doktor ha kaba ka la don ka jingbym ïasngewthuh jingmut ha ka rukom ïa kren hapdeng jong ki.
Ka la ong ba halor kane ka la don ruh ka video ne ka dur khih kaba la saphriang sted bha kaba la pynlong ïa ki paidbah bad ïa ki Sengbhalang bapher bapher ba ki la wan ban wad jingtip halor kaba la jingjia baroh.
Namarkata, ka Dr. M. Lyngdoh haba kren ha ki lad pathai khubor ka la ïathuh ba ïa kine kiei kiei kiba la jia baroh kum ka khlieh duh jong ka Civil Hospital Mawkyrwat ki la dep ban ïa kren sngewthuh jingmut lang la ka long hapdeng ka longkmie kaba wan shim dawai bad kumjuh ruh ïa u Doktor ha kaba mynta kim don shuh kano kano ka jingïasahnud ïa kaei kaba la jia ne jingbakla baroh. “Ha ka jingim jong ngi kum ki briew ngim lah ban biang lut ha baroh ki liang hynrei ka nuksa kaba bha tam ka dei ka jingpdiang bad ka jingïamap mar kylliang”, ong ka Dr. M. Lyngdoh.
Shuh shuh ha kaba ïa dei bad ka khubor hamsaïa kaba ong ba na ka liang u Dr. W. Dkhar uba dei peit kyrpang ïa ki khyllung ne kum u Specialist ba u la mut ban iehnoh noh ïa ka kam kum u Doktor napoh ka Civil Hospital Mawkyrwat, na ka liang ka Dr. M. Lyngdoh ka la pynshai ba halor kane ka mat ka la don ka jingïakren sngewthuh jingmut lang la ka long bad ki Sengbhalang bad ruh ïa u Doktor ha kaba haduh mynta la lah ban pynjanai bad pynbeit ïa ki jingbakla baroh bad une u Doctor un dang sah hi ha kane ka jaka sumar.
“Lada mih noh uwei na ki Doktor na kane ka jaka sumar, ngi sngewthuh shai ba ngin sa shem jingeh shibun ban ïoh ïa ki Doctor Specialist kiba trei hapoh Hospital Sorkar” ka la ong namarkata, kum ki paidbah ki dei ban sngewthuh ba ha baroh ki liang ki dei ban don ka jingïatrei lang bad ka kyrmen skhem ba nangne shakhmat kiba kum kine ki jingjia kin nym jia shuh.
Ha kawei pat ka liang, ka KSU Mawkyrwat Circle hapoh ka jingïalam jong u bah Pulljohnstar Wanniang, Vice President haba kren ha ki lad pathai khubor ki la pynpaw ka jingsngewbynniaw halor ka jingsaphriang stet jong ka dur khih ne ka video kaba la jia hapoh ka Civil Hospital Mawkyrwat namar kumba ka seng hi na ka por sha ka por ka don ïa ka thong bad ka jingïohi jngai kaba kongsan tam ka long ban pynïohnong bad wan rah jingmyntoi jong u paidbah ba bun balang.
Kum ka seng ka pynpaw ruh ka jingsngewdiaw ba ki la don ki kynhun kiba la shim da kiwei pat ki synjam namar ha ka jingshisha ïa ka jingjia hapoh Civil Hospital Mawkyrwat lah ban ïa pynbeit hapoh ki saw kynroh jong katei ka jaka sumar hynrei la pynsa-phriang bad ïalam bakla pynban ïa ki nongpeit ïa kato ka dur khih ne video. Kumta ka KSU ka kyntu ba nangne shakhmat lada don kino kino ki kam ne ki issue dei ban wad jingtip shwa ïa ka jingshisha bad kren da ka lynti kaba shai ym ban shim da ka lynti ban thad burom ïano re ïano.