Ba matlah ki nongmihkhmat da ki phew snem mih ki paidbah shnong ka thaiñ Langdongdai ban maramot hi ïa ka surok

Nongstoiñ, Naitung, 3: Namar ka jingjynjar jong ki paitbah ha ka leit ka wan bad ka kit ka bah, namar ka jingbym don ïa ka surok ba biang na Mawdiang haduh Langdongdai, ki nongïalam ka Synjuk Rangbah shnong Nongtrai Sepngi Langdongdai area, ka la lum ïa ki para nongïalam bad ki dkhot jong ka Synjuk Nongsynshar Shnong Langdongdai Area na ki khatphra tylli ki shnong kiba don ha katei ka thaiñ ha ka sngi saitjaiñ ka 2 tarik Naitung ha kaba ki la ïa mih ban maramot ïa katei ka surok.
Ka jingmaramot ka la sdang naduh ka shnong Mawkyllon, ha kaba ïa ki jaka ki bym lah shuh ban trei da ki briew la pyntrei da ka puh shilum, ha kaba ïa ka bai trei jong katei ka puh shilum la noh synñiang sanphew tyngka kawei ka longïing bad ka jingïamih ban leit trei pat ka synjuk ka la pynbeit uwei na man kawei pa kawei ka thliew ïing na baroh khatphra tylli ki shnong.
Ka jingmih ki paitbah ban maramot ïa katei ka surok ka long kaba ryntih ha kaba kiba poi ki long palat saw spah ngut. Nalor kata ka synjuk ka la pynbeit ar tylli ki kynhun kawei ka kynhuh ka sdang na Langdongdai bad kawei ka kynhun pat ka sdang na Mawdiang sha Mawkyllon bad ïakynduh ha wah Riangken ka jaka kaba mar pdeng bha.
U bah Birbor Riangtem secretary ka Synjuk haba ïakren bad ki nongthoh khubor, u la ong ba ka jinglum lang jong ki ïa ki paitbah ban maramot ïa katei ka surok naduh Mawdiang haduh Langdongdai, ka long tang ban lait na ka jingsahkut ki kali haba kit ïa ki mar bam mar dih bad ki tiar ki tar ban pynpoi ha ki shnong kiba don ha katei ka thaiñ.
U la ong ruh ba ki paitbah katei ka thaiñ ki la mad jingeh haduh katta katta watla manla u snem ki ju maramot ïa katei ka surok, hynrei tang shu wan ka lyiur ka la sniew ar shah namar ka dei ka jaka ba long khyndew met. U la ong ruh bad wat la ki paitbah ki ïakynduh jingeh katta katta ruh, na ka liang ka sorkar bad ki nongmihkhmat kim patiaw ei ei wat haba ki la leit ban pynsngew la bun sien bun wat.
U bah Riangtem u la ong ruh ba wat ha kine ki bnai ba la dep, ki la pyrshang ban maramot hynrei na ka jingbym pat sangeh jong u slap, ym shym la lah ban maramot kat haduh ba ki kali ki ba kit ïa ki mar bam mar dih bad ïa ki tiar ki tar kim pat lah satia ban ïaid.
Utei u rangbah u la ong ruh ba kaba isangsot palat ka dei ïa kiba pang ba shitom kiba mut ban leit phah sumar ha Riangdo CHC bad ïa ki longkmie ba armet kiba mut ban leit phah check up ha ki Doctor ha Riangdo, namar ki hap ban ïaid suki jai bad naduh Mawsmai, Langdongdai, Nonghawei, Porshken Nongrathaw, Mawguru bad kiwei kiwei, ka shim por saw haduh san kynta ïa kiba shitom ba kin ïaid da ka kjat haduh ban da poi ha ki jaka ba lait kali.
U la ong ruh ba lada ki nongmihkhmat bad ki heh sorkar ki kwah ban tip haduh katno ka jingjynjar jong ki paitbah, kin sngewbha ban da wan pyrshang dalade ban ïaid da ka kjat na Mawdiang haduh Nonghawei, kata ruh lada dei ha ka por ba ki shait ki khlaiñ, khnang ba kin sngewthuh bad lada ki pang pat kin pyrshang ban ïaid da ka kjat tang na Mawdiang haduh Langdongdai hato ki poi ne em hynriew kynta. Lada ki sngewthuh ki la dei ban leh ei ei ïa katei ka surok na ka bynta ki paitbah.