Shillong, Risaw 30 : U Chief Executive Member ka KHADC, Bah Pynïaid Sing Syiem ha ka sngi Balang u la ïalam ïa ki Executive Member ryngkat u Deputy CEM, Bah PN Syiem ban leit kynduh bad ai khublei ïa u Lat ka Jylla u CH Vijayashankar hadien ba u la ai ïa ka jingmynjur ïa ki 6 tylli ki Bill jong ka Council ba kin lah ban treikam noh kum ki aiñ ba thymmai.
Ha kane ka sngi ki Executive Member kiba leit lang ki kynthup ïa ka Kong Grace Kharpuri bad ruh u Bah Teibor Pathaw.
Lah ban kdew hangne ba kitei ki Bill kiba la long aiñ mynta ki kynthup ïa ka Khasi Hills Autonomous District (Administration of Elaka) (Amendment), ka KHAD (Nomination and Election of the Lyngdoh, Myntri, Lyngdoh Raid and Sordar Shnong and Administration of Sohiong Lyngdohship, 2023, KHAD (Regulation and Administration of Land) Rules, 2023, United Khasi-Jaintia Hills District Fishery (Amendment), 2023, nangta ka KHAD (Khasi Social Custom of Lineage) (Amendment), 2023 bad ka KHAD (Trading by Non-Tribals) (Amendment) Rules, 2023.
Shwa kane, u CEM haba kren bad ki lad pathai khubor u la ïathuh ba na ka liang ka KHADC ka sngewkmen haduh katta katta ba u Lat u la ai jingmynjur ïa kitei ki Bill ba kongsan bha kiba dei na ka bynta ka Jaidbynriew khnang ba kin lah ban treikam noh kum ka Aiñ na ka bynta ka jingmyntoi jong ka Ri bad ka Jaidbynriew katkum ki kyndon treikam ba la bynshet ha ka Council.
Katkum ka jingong jong u, ka aiñ KHAD (Administration of Elaka) ( Amendment), kadei kawei na ki aiñ kiba kongsan bha na ka bynta ban wanrah ïa ka suk ka saiñ ha ki shnong ki thaw khamtam eh hadien ba la mynjur ban ai jingithuh noh da ka aiñ wat ïa ki Seng Longkmie bad ki Seng Samla na ka bynta ban pynkhlaiñ shuh shuh ia ki Dorbar Shnong.
U ong ruh ba ka jingdon jong kane ka aiñ kan ïarap ruh ban tehlakam ïa ka rung ka mih katba jong ki briew katba mon ha ki shnong ki thaw bad khamtam eh ha ka jingïakhun pyrshah ïa u drok.
