Shillong, Naitung 05 : Ka kynhun ïalehkai jong ka Nangkiew Irat hynne ka sngi ka la mad ïa ka jingjop kaba nyngkong ha ka lympung ïalehkai jong ka Shillong Premier League hadien ba ka la ïoh ban pynliem ïa ka kynhun ïalehkai jong ka Mawkhar SC haduh 2-0 kol kaba long ha ka Third Ground, Polo.
Shwa kane, kitei baroh ar tylli ki kynhun kim pat mad wat tang shisien ruh ïa ka jingjop ha katei ka lympung. Ka Nangkiew ka dang ïoh ban ïakhaid ar tylli ki jingïalehkai na ki lai tylli ki jingïakhun katba ka Mawkhar pat ka dang ïoh ban ïakhaid tang kawei ka jingïalehkai.
Ha ka kylla step, baroh ar liang mamla ki la ïakhun tyngeh ban ïoh thep kol bad kane ka la plie lad ïa ka Nangkiew ban lamkhmat lyngba u Chanmitre Thma uba la ïoh ban shim kabu ïa ka jingbakla hapdeng u rangap kol ka Mawkhar bad u rangapdien katei ka kynhun. Kumta u Chanmitre da kaba suk u la ïoh ban pyntyllun suk ïa ka bol sha kol hadien ba kitei ki arngut shi paralok ki la ïatyngkhuh.
Ka shi kol kaba wan lyngba u rangïalehkai ba mih madan na kaba shong ben, u Bris Taro ha ka minit kaba 89 ka la nang ai mynsiem shuh shuh ïa ka kynhun ba kan khur suk ïa ki lai point ha katei ka janmiet.
Ha ka jingshisha, ka Mawkhar naduh ba sdang ka la ïakhun tyngeh hynrei kam shym lah satia ban pynkhih jar naduh kaba sdang watla ka ïoh bun ki lad khamtam naduh ka minit kaba 5 jong ka kylla step.
Ka jingïalehkai ha ka kylla miet ka la nang itynnad bad shongshit shuh shuh khamtam haba ka Nangkiew Irat ka la duh noh uwei na ki rangïalehkai, u Damanbha Chyne uba la ur noh katba u dang beh ïa ka bol bad kumta u la hap ban mih noh na madan. Pynban watla katta ka dang ïoh ban pynsyier bunsien tangba u rangïalehkai ba mih bujli, u Deligent Pdang u khlem lah satia ban pyndei ïa ka bol kaba la pynkiar da ka Mawkhar ha phyllaw kol.
Hapdeng ki jingpyrshang bad ki kabu ksiar kiba bun kiba wan, hynrei ka Mawkhar kam shym la lah ban pynkhih ïa ka jar jong ka Nangkiew. U Justerwell Tham u la dei ban ïoh pynkhih jar ha ka minit kaba 65 kumjuh ruh u Banehskhem Khongsdam hadien kane pynban ha kaba kut ka bol ba ki rah kam shym la lah ban pynkiar ïa u rang ap kol.
La ïohi ruh ba ha ka por ba ka Mawkhar ka la pynkhlain bha shakhmat, ka Nangkiew pat ka la pyrshang ki buit kumno ban ïoh thep kol biang bad kane ka la urlong hadien ba u Taro u la ïoh ban thep ïa ka kol kaba ar na ka bynta ka kynhun.
Da katei ka jingjop, ka Nangkiew Irat ka la kiew na ka kyrdan kaba hynriew sha ka kyrdan kaba saw da ki san point. Mynta ka sngi Balang pat ki paidbah kin sakhi ïa ka jingïakhun hapdeng ka ka Ryntih kaba don mynta ha ka kyrdan kaba ar pyrshah ïa ka Shillong Lajong ka kynhun kaba don ha ka kyrdan kaba 7.
