Nongpoh, Naitung 06: Ka long kaei kaei kaba sngewsih ha kaba tang na ki daw ka jingbuaid ka ju wan rah ïa ki jingjia ba sngewsih, ha kaba mynta ka janmeit ka Kali u MLA ka North Shillong ba kawei pat ka Kali ki la shah tynrah ha kawei ka Kali S-Presso haduh ba ki la julor bad donbok ba ym shym la don ba mynsaw ha kane ka jingjia.
Kumba la ioh lum jingtip, kane ka jingjia ka la jai ha ka por 7 duna ei ei janmiet ha Umïam ha lad Orchid hakaba la kynnoh ba ka Kali S-Presso kaba don ïa u number ML 05 AB 8537 bad ba la niah da u Ksankupar Jyrwa ka la leit ban tynrah kynsanïa ka Kali Maruti 800 ba don ïa u number ML 05 C 6579 bad hadien kata ka sa leit ban tynrah sa ïa ka Kali Scorpio ba don ïa u number ML 11 0808 bad kaba dei ruh ka Kali jong u Bah Adelbert Nongrum, MLA ka North Shillong.
La ioh lum jingtip ruh halor kane ka jingjia, ym shym la don satia kiba mynsaw bad lait noh ka jingjulor kitei ki Kali ba la tan noh sha Umïam Police station bad ka Kali u MLA kaba la julor malu mala ka dang lah ban ïaid bad halor kane ka jingjia ki Puit ki la dep register case ha Umïam Police Station bad ka jingtohkit ruh ka deang ïaid shakhmat.
Ki Nongthoh khubor ki la ioh ruh ban ïa kren bad u Bah Adelbert Nongrum kum u MLA ka North Shillong bad u la pynthikna ruh ba kane ka jingjia ka jia, ka dei tang na ka daw ki kam buaid jong u dribar katei ka Kali S-Presso bad donbok noh ba ha kane ka jingjia ym shym la don ba mynsaw ha kaba ma u, ka Kiaw, ka kurim bad ki khun ki dang thmu ban hiar sha Umsning bad kane ka jingjia ka la jia pat ha umïam tang na ki daw ki kam buaid utei u dirbar ka S-Presso.
Shuh shuh, u la pynpaw ruh ïa ka jingsngewsih ban don kum kine ki jingjia kiba ym dei ban jia bad kaba la jia pat na ka daw ki kam buaid ki dirbar. Ha kawei ka bynta u la buh ruh ka jingkyrpad ïa ka tnad Pulit ba kan peit pyrman ïa kum kine ki kam buaid ki Dribar ha ki surokbah bad ruh ban paraha khang ban lah ban pynduna ïa kine ki jingdih buaid ha ka por ba niah kali, namar bunsien kane ka ktah ïa kiwei mynsiem ba lui lui kaba ju jia tang na ka jingpynher sted ïa ki Kali bad ka jingbuaid ha ka por ba ñiah Kali, u la bynrap.
