Shillong, Nailar, 27: U nongïalam jong ka Congress Legislature Party (CLP) u Bah Ronnie V. Lyngdoh ha ka sngi Baar ula iehnoh kam kum u Nongïalam jong ka Liang Pyrshah ka Ingdorbar Thawaiñ ka Jylla. Ïa ka jingiehnoh kam jong u Bah Ronnie V. Lyngdoh la pynbna da u Commissioner and Secretary jong ka Secretariat ka Meghalaya Legislative Assembly u Dr. Andrew Simons.
Ka jingiehnoh kam jong une u MLA ka Congress na Mylliem Constituency ka long hadien ba ka Congress ka la sah sa tang uwei u MLA hapoh ka Ingdorbar Thawaiñ ka jylla kaba don 60 ngut ki dkhot hadien lai ngut ki MLA ka Congress ba kynthup ïa u MLA ka Umsning u Dr. Celestine Lyngdoh, u MLA ka Nongstoiñ u Bah Gabriel Wahlang bad u MLA jong ka Mawhati u Bah Charles Marngar ki la mih noh na ka Congress dang shen bad leit pynïasoh kum ki MLA jong ka National Poeples Party (NPP).
Da ka jingpynïasoh jong ki lai ngut ki MLA ka Congress, ka NPP ka la kiew sha ka jingbun paid kaba 31 ngut ki MLA hapoh ka Ingdorbar Thawaiñ ka Jylla.
