Shillong, Nailar, 05: Shi sngi hadien ba u Myntri Rangbah jong ka Jylla u Conrad Kongkal Sangma u la kren da kaba shai ba ka Sorkar Jylla kam don lad shuh da kumwei pat ban ïarap ïa ki nonghikai kiba shu hikai kontrak ha ki skul sorkar bad kiba don hapoh ka shatri jong ka Meghalaya Government LP Contractual Teachers’ Association, ha ka sngi Thohdieng u President jong ka Association u Bah Birbor Riangtem u la leit ban aiti lut ïa ki Dulir ha ka ophis jong u Myntri Rangbah ka Jylla, kata, naduh ka Election Photo Identity Card, ka Aadhaar Card, ka Driving License, ka Pan Card, ka Marksheet D.El.ED, ka Marksheet ba la pyndep ïa ka Bachelor Degree, ka Marksheet Class-XII, ka Registration Card Class-XII, ki Admit Card jong ka Class-XII bad Bachelor Degree, bad kiwei kiwei de ki kot ki sla kum ka dak ban pynkut noh shisyndon ïa ka wadkam wadjam ha ki tnat treikam jong ka sorkar Jylla.
Ïa mynta kane ka jingaiti ïa kine ki Dulir sha ka Sorkar la lam khmat shwa tang da u President bad ha kine ki khyndiat sngi yn sa bud pat sa ki nonghikai skul Kontrak kiba la don hapdeng ka jingkutlad hadien ba ki la shah weng noh na kam kaba ki la trei baroh shikatta ki snem.
Hadien kane ka jingleit aiti ïa kine ki Dulir sha ka Sorkar, ka Meghalaya Government LP Contractual Teachers’ Association, ka la pynbna paidbah ba kan pynkut noh ïa ka jingñakhih kaba khlem pud sngi.
