Shillong, Rymphang 19 : U Lamphang jong ka Iing Dorbar Thawain ka Jylla, Thomas A Sangma ha kane ka sngi Balang u la hap ban pynsangeh shwa shipor kumba 10 minit ei ei ïa ka jingïatai hadien ba ka la mih ka thma ktien kaba jur bha hapdeng ka Liang Pyrshah bad Liang Synshar katba ka jingïatai ka dang ïaid halor ka ishu Inner Line Permit.
Shwa kane, na ka liang u MLA ka VPP Bah Ardent M Basaïawmoit u la ong ba ka sorkar jylla kam shym la shimkhia satia haba ïadei bad ka ILP. “Balei ka jylla ka kwah ïa ka ILP? Kadei namar ka jingrung kyrthlep ki briew kam dei satia tang na ki barri hynrei ruh na ki briew kiba nabar. Kumta nga kwah ïa ka jubab kaba shai na ka sorkar…..” u la ong.
Na ka liang u Myntri Rangbah haba jubab halor kane u la kyntait ïa ka jingkynnoh bad u la pynshai ruh ba u la dep ban kynduh bunsien bha bad u Myntri Rangbahduh ka Ri kumjuh bad u Myntri Kampohiing halor ka ILP. U la buh jingkylli ruh ïa u Bah Ardent da kaba ong ba katno sien u MLA u la thoh sha u Myntri Rangbahduh ka Ri bad Myntri Kampohiing lane ban kynduh ïa u Myntri Kampohiing halor ka ILP.
Katba na ka liang u Symbud Myntri Rangbah, Bah Prestone Tynsong pat u la ong, “Lada phi sngewkhia shisha phi dei ban leit sha Delhi.”
Hadien katto katne por ba la bteng biang ïa ka Dorbar, u Lamphang u la ong, “Nga kwah ban pynkynmaw ïa ka Iing ba kane ka dei ka jaka ba ngin ïatai ha ka lynti kaba donakor. Nga kyrpad ïa baroh ki dkhot ba kin shim bynta ha ki jingïatai, jingkylli bad jubab ha ka rukom kaba donakor.”
Na ka liang u Myntri Rangbah haba bteng biang ban jubab u la ong ruh ba wat ki sengbhalang bad ki kynhun bapher bapher ki la leit bad ki la thoh sha ka sorkar pdeng halor ka ILP. “Ngi dei ban pynpaw da ka ïa kaei kaba ngi kren.”
Halor kane u Bah Ardent ruh u la kylli kylla, “Lada u Myntri Rangbah u kynnoh ïanga, nga kwah ruh ban tip katno sien ka sorkar ka la khot lang ïa ngi khnang ba ngin leit lang sha Delhi. “U MP jongngi ruh u la rah ïa kane ka ishu.”
Hadien kane pat haba u MLA ka North Shillong Bah Adelbert Nongrum u la kynnoh ïa ka sorkar ba ka pynbiej ïa ki paidbah halor ka ILP, na ka liang u Conrad u la ong, “Lada don kiba pynbiej, dei ma u ba pynbiej. Man ka por u wan hynrei um ju kynduh pat ïa u Myntri Kampohiing lane thoh sha u.”
Katba na ka liang u Symbud Myntri Rangbah Bah Prestone Tynsong u la ong, “Lada u Bah Adelbert u ong ba ngi pynbiej, kaei ka jingmut ba u ong pynbiej? Phi lah ban pynshisha ïa kata? Ailad ïa u ban pynshisha.”
Ka jingïatai halor kane ka mat ka la ïaid wat palat ïa ka Kynta kylli jingkylli ruh tad haduh ba u Lamphang u hap ban tuklar bad pyntip ba ka kynta kylli jingkylli ka la kut bad ba kin shong noh.
