Ba kyntait rejister case ïa ka Ejahar pyrshah ïa ka Engineer ba kynnoh dawa pisa ujor u Contractor sha u DGP

Tura, Risaw 05: U Contractor na Tura uba la kynnoh ba shah pynbor ban ai pisa da ka Engineer ka PHE ha North Garo Hills, ula thoh sha u Director General of Police (DGP) bad dawa ban leh tyngeh ïa u Officer in-Charge ka Bajengdoba Police Station namar ka jingkyntait ban register ïa ka ejahar ba la ujor la palat artaiew pyrshah ïa ka jingbamsap kane ka Engineer.
La kynnoh ba ki Pulit ka North Garo Hills ki la leh mynthi ban register ïa ka case ba ula ujor da une u Contractor, kaba la pynbor ïa u ban leit mudui da ka mukotduma sha ka ïing Bishar High Court jongka jylla.
Hynrei, u Officer in-Charge ka Bajengdoba Police Station u dang ïai bteng ban pynslem ha ka ban register ïa ka ejahar halor ka nongrim ba u donkam ban bud ïa ki lynti treikam bad shim ïa ka jingbit na ka Sorkar Jylla watla kane ka jingpan jingbit ka donkam tang ha ka por ba dei ban kem ym ban register ïa ka case pyrshah ïa ka.
“Halor kaei ka kyndon aiñ lane CrPC ba u Heh Pulit u kyntait ban register ïa ka case?. Kam don jingkhang satia ïa ki Pulit ban register ïa ka case kam bymman bad ban tohkit ïa kino kino ki Ophisar Sorkar bad ka jingbym register ïa ka ejahar ka dei ka jingpynkheiñ ïa ka aiñ” ong u Contractor ha ka mudui ba la phah sha u DGP Dr LR Bishnoi.
Ha ka shithi ujor sha u DGP bala aiti ha ka 4 tarik Risaw, ula kdew ba kat kum ka kyndon 197 jong ka Code of Criminal Procedure of 1973, ka la shai ba ka jingkhang ba la kdew ha kane ka kyndon ka long (i) pyrshah ïa ka jingshimkhia da ka ïing Bishar bad (ii) ym ban register ïa ka criminal case lane tohkit da ki Pulit lane aiti ïa ka kaiphod da ki Pulit hadien ba pyndep ïa ka jingtohkit, kumba la batai da ka kyndon 173 jong ka Code of 1973.
U ong ba ka jingïai pynslem ban register ïa ka ejahar ka la buh ïa ki Pulit ha North Garo Hills ha ka jinglehraiñ haba phai sha ka jingregister bad tohkit ïa ki kam bymman khamtam lei ka jingkynnoh bamsap.