Ba kynnoh tyrwa knia bad bam doh briew ïa ka shnong ha jylla, ujor FIR u Social Activist ïa u Guru

Shillong, Naitung 13: Uwei na kiba trei monsngewbha u la phah ka jingujor ejahar (FIR) pyrshah ïa uwei u briew uba kyrteng u Sushil Guru bad u youtuber u Raghav Sharma kiba la pynmih ïa ki jingkynthoh kiba ktah pyrshah ïa ki jaitbynriew riewlum kane ka thaiñ shatei lammihngi.
Une uba treimon sngewbha (Social Activist) uba kyrteng u Bah Enlang Sawian, ha ka jingujor kaba u la phah ha Lumdiengjri Pu la ong ba utei u Guru u la kynnoh ïa ki riewlum trai ri trai muluk ba ki dang leh ïa ka knia ka khriam da ki briew bad ka jinglong riewkhlaw kaba long shi bynta na ka jingngeit ki longshwa manshwa.
La ïathuh ba kine ki jingkynthoh la pyllait paidbah da u youtuber ha ka 13 tarik u bnai Jylliew. Une u briew uba kam ïalade kum u sadhu u la ïathuh ha utei u Youtuber ba kawei ka shnong riewlum kaba don ha jylla Meghalaya, ka dang knia da ki briew kum shi bynta na ka jingleh niam jong ki.
“Ka la don kawei ka shnong ha jylla Meghalaya ha kaba ka jingknia da ki briew ka dang ïai don haduh mynta. Ki tymmen ki san jong kane ka shnong ki knia da u briew bad ïa ka doh jong u pat la sam paidbah kum ka jingbam prasad, kaba ki la bam naba ki dang dei ki riewlum,” kynnoh u Guru, da kaba kam shuh shuh ba 4 ngut ki briew ki lah ban rung hapoh kane ka jingknia jingkhriam, hynrei tang 3 ngut ki la wan phai ban pynpaw ba kine ki jingleh ki dei ki jingtyrwa ha ka jingleh niam ym kum ki kam runar.
Kane ka jingjia ba ïathuh khana kaba lyngkot, kaba la ktah ruh kumjuh halor ka tantra, ka jingknia ha u ksuid ne black magic, bad ka jinglehniam kaba dei ka kam mynsiem, ka la neh ha ka online bad ka la lah ruh ban lum ïa ki nongpeit haduh 47,000 ngut.
Haba kren sha ki lad pathai khubor, u Bah Enlang Sawian u la ong ba kum kine ki khana ba thok bad ki jingkam kiba ktah ba la kren kynthoh da u Guru ki la long kiba la pynjah burom. “Kam shym la don satia kano kano ka jingtyrwa jingknia da ki briew ne ka kam riewkhlaw hapoh ka jylla jong ngi. Kine ki dei ki jingthok kiba wanrah ka jingïa isih bad kiba pynthoh bria ïa ka dur ka dar jong ka jylla,” u la ong.
U Bah Sawian u la kyntu ïa ki pulit ban shim da ka kam kaba tyngeh ïa une u briew hapoh ka Section 196 of the Bharatiya Nyaya Sanhita 2023 bad bynrap ba un ïai buddien ïa kane ka kam bad ka National Commission for Scheduled Tribes and Scheduled Castes.
U Bah Sawian u la ïai ban biang da kaba ong ba kum kine ki jingïathuh kiba khlem nongrim ym tang ba ki pynjah burom hynrei ki long ruh kiba ma haduh katta katta, naba ka ïalam sha ka jingpyni paidbah kaba mynsaw bad ka jingsngewthuh bakla hapdeng ki kynhun jaitbynriew.