Jowai, Nailur 26 : Ki arngut shipara u Dame Phawa bad ka Elut Phawa kiba shong wai ha Mookymphad Mihmyntud kiba dei ruh naka shnong Musiaw West Jaiñtia Hills District mynta ka sngi kila leit ban ujor da ka Ejahar ha Jowai Police Station halor ka jingshah ktah kti jong ki ha ïing sah jong ki.
Katkum ka ejahar ki ar ngut kiba donkti ktah kti ban shoh ïa ki, ki kynthup ïa u Ohi Shylla bad u Kynmoo Phawa kiba na ka dong Mihmyntdu hi katba ïa ki ar ngut kiwei pat kiba ïadonlang kim shem la ithuh kyrteng.
Kine ki ar ngut shi para kila ïathuh ba kane ka jingjia kala jia hynnin ka sngi 25 tarik u Nailur 2022 ha ka por kumba 7 shiteng mynmiet eiei katba ki dang ïañia shi para lane shiïing shisem. Hynrei ha kata hi ka por kitei ki briew kila wan pyrta bad phah pynmih ïa ki napoh ïing ynda haba u Dame Phawa ula mih shabar kitei ki briew u Ohi Shylla, u Kynmoo Phawa lem sa ar ngut kila ktah syndon da ka kti wat hadien ba u Dame Phawa ula pan map na ki lada don ki jingbakla.
La kynnoh ba ha ka por ba ki kura, ki kynjat bad kyrdem ïa u Dame Phawa katei ka para jong u kaba dang don ruh hapdeng ka jingarmet haba kala ïohi ïa katei ka jingjia kala mut ban leit ïarap ïala u hynmen hynrei ïa ka ruh la shah khynñiat sharud lem bad u para ar kmie jong ka bad donbok ba kam shem la mynsaw.
Na ka liang kine ki ar ngut shi para mynta hi ka sngi kila leit ban ujor FIR syndon sha Jowai Police Station bad dawa jur na ki pulit ba kin pynshitom ïa kitei ki briew ba donkti katkum ki kyndon aiñ.
La ïathuh ruh da ka Elut Phawa ba mynne mynstep kila ïoh jingtip na ka trai ïing ba ki sah wai ba ïa ki la phah pynmih noh na katei ka ïing ba ki shong wai, shuh shuh katkum ka jingïathuh jong kine shipara ki dei ruh ki khunswet ki bym don shuh ïaki kmie ki kpa.
Halor kane na ka liang ka All Hynñiewtrep People United Front (AHPUF) lyngba u Secretary ma C. Sungoh kila pynrem jur ïa kane ka jingleh kitei ki briew ba shah ujor kiba la nud ban ktah da ka kti ha ka jaka ban ïakren sngewthuh jingmut bad na ka liang ka seng ka pynrem jur ïa kane.
