Shillong, Risaw 28 : U Symbud Myntri Rangbah ka Jylla. Bah Prestone Tynsong ha ka sngi Thohdïeng u la ïathuh ba ki dang ap ïa ka kaiphod na ki bor distrik halor ka jingujor pyrshah ïa uwei na ki Myntri sorkar, u Bah Dasakhiat Lamare kaba la kynnoh ba u sam pisa sha ki paidbah ka Nongkrem constituency.
“Haduh mynta ngam pat ïoh ïa ka kaiphod na ki bor distrik. Kum kine ki jingjia, ngam tip la ki dei kiba shisha lane kim dei hynrei ngin hap ban ap bad haba ngi ïoh ïa ka kaiphod na ki bor distrik lehse ngan sa lah ban ong halor kata,” u la ong haba kren bad ki lad pathai khubor.
Da kaba pyntip ba ïa kane ka kam u Chief Electoral Officer (CEO) u la phah sha ka Deputy Commissioner, na ka liang u Symbud Myntri Rangbah u la ong, “Ai ba ki bor distrik kin leh ïa kaba donkam bad shim ïa ki sienjam ban pynshisha bad ban phah ïa ka kaiphod sha ka sorkar,” u la ong.
Lah ban kdew hangne, ba kadei ha ka 24tarik mynta u bnai ba u Myntri ka tnad PWD Building bad MLA ka Mawhati, Bah Dasakhiat Lamare u la ong ba um salia ban leit sha phatok tang na ka daw ba u ïarap ïa ki paidbah ka Nongkrem constituency, ka thaiñ kaba un aireng ha kane ka elekeshon MLA kaban long ha u 2023.
