Ba kynnoh donkti ki Politishian bad ki ophisar ban tih dewïong be-aiñ, dawa tohkit u Mukul

Shillong, Jymmang 02: U Nongïalam ka liang pyrshah u Mukul Sangma u la dawa da ka jingtohkit halor ka jingkynnoh donkti hapdeng ki riew saiñ pyrthei bad ki ophisar ne bureaucrat kiba pynsuk ïa ka kam tih dewïong beaiñ bad kumjuh ruh ïa ka jingshalan ïa u dewïong ha Meghalaya.
“Kane ka kam beaiñ haba ïadei bad ka kam tih dewïong beaiñ ha Meghalaya ka la jia namar ka jingdonkti hadpeng ki riew saiñ pyrthei bad ki ophisar kiba la pynsuk ïa kane ka kam beaiñ. Namar kata ka jingtohkit ka dei ban long shalyndet jong kaei kaba la jia mynta,” ong u Sangma, uba dei ruh u nongïalam ka All India Trinamool Congress (TMC) haba kren sha ki lad pathai khubor.
“Kane ka kam ka la paw na ka daw ka jingdonkti hapdeng ki riew saiñ pyrthei bad ki ophisar, hapdeng ka bor synshar bad ki ophisar. Namarkata dei ban bthah ban buh da ka jingtohkit khnang ban lah ban ïada ïa ka bha ka miat jong ki paidbah bad ka jylla baroh kawei,” u la bynrap.
Haba phai halor ki jinglap ba dang shen jong ka jingtohkit da ka enforcement directorate (ED), u Sangma u la buh ruh ka jingkylli halor ka jingpulom jong ki pulit ka jylla ban lap bad ban shim kam pyrshah ïa ki kam beaiñ kiba donkti ban tih ïa u dewïong ha ka jylla.
“Lada ka ED ka lah ban wan bad ban lap ïa ki sakhi ha kano ka rukom pat ba ki pulit kim lap ïa ki sakhi?”
“Lada ka jingtih dewïong beaiñ ka jia dei ruh ban don bun ngut ki nongbylla kiba wan na shabar jylla. Lada ki don bun ki bar jylla ha, hato kum u DC ne SP kim tip ïa kane? Hato ki pulit kim ïoh ki jingkyrshan na ki lad syntiat bad ki riewshem phang halor kine ki kam? Ki pulit ki don lut baroh,” buh jingkylli u Mukul.
U la kdew ruh ba na ka liang pyrshah ha kiba bun ki khep ki la pynpaw ïa kane sha ka sorkar la ka dei hapoh ka Ïingdorbar Thaw aiñ ne shabar ka Ïingdorbar.
“Nga la thoh ka shithi sha u chief secretary. Hato u la shim khia ïa kane? Nga la phah ka shithi wat sha ka sorkar pdeng, hynrei ki khlem shim kam satia,” ong u Sangma da kaba bynrap ba ka kam dewïong kam dei ka kam jong ka jylla hynrei ka dei ka bynta jong ka sorkar pdeng bad namar kata ka sorkar pdeng ka dei ban shim khia ïa kane ka kam.
Shuh shuh u Myntri Rangbah barim ka jylla u la ong ba haba peit lyngba ki khubor, ka ED ka la kdew ba ka la don ka jinglum pisa kaba bun bha na kawei kawei ka trok.
Haba kynnoh ïa ka jingkyntait jong ka sorkar ba ka don ka kam tih dewïong beaiñ ha ka jylla u Sangma u la ong, “Nga tharai ki lad pathai khubor ki la kylli ïa kane manla ka por ïa u Myntri Rangbah, hynrei kaei ka jubab kaba mih ka dei beit tang ka jingkyntait.”
Ha kajuh ka por u nongïalam ka liang pyrshah u la kynnoh ïa ka tnat pulit ba kam lah ban shim kam halor ki FIR ba la ujor pyrshah ïa kane ka kam tih dewïong beaiñ ha ka jylla.
“Kano kano ka kam beaiñ haba ïadei bad ka kam tih dewïong ka dei barabor ka jingpynkheiñ kaba dei ban pynshitom. Mynta hato ka sorkar ka la shim khia ne em ïa kane ka kam beaiñ. Haduh katno tylli ki FIR ba la dep ban ujor la kadei na ki riew shimet, ki nokma, clan, general vigilant public. Hato ki la jubab ïa kine?”
“Hato phin ïohi ïa ki kaiphod jong kine ki FIR kiba la ujor da ki kynhun kiba sngewkhia ïa ki nongshong shnong, hynrei na ka liang ki pulit ki ai ka jubab ba kim don ki sakhi ba biang halor kane ka kam,” bynrap u Sangma.