Ba kular u DC-EJHD, weng noh ka JAC ïa ka jingïakhih pyrshah ïa ki karkhana dewbilat

Khliehriat, Iaiong 21: Namar ka jingbym patiaw ki karkhana dewbilat ïa ka jingdawa bai kit bai bah kaba ka JAC ka dawa ban siew 1500 tyngka shiton, ka JAC ka la pynbna ban pynlong da ka jingiakhih, halor kane mynta ka sngi hadien ka jingiakynduh bad u Deputy Commissioner ka East Jaiñtia Hills District, u Shivansh Awasthi, IAS ka JAC ka la pynbna ban weng noh shwa ïa katei ka jingiakhih namar u DC u la kular ban shim khia bad un sa khot ïakren ïa ki ar liang mamla ban ïa pynbeit bha halor kane.
Kum ban shu pynkynmaw, ka Joint Action Committee (JAC) kaba kynthup ïa ka Jaiñtia Hills Truck Owner’s Association (JHTOA), Meghalaya Commercial Truck and Driver Association (MCTDA) bad All Jaiñtia Cement and Clinker Transporter’s Association (AJCCTA) ka la pynpaw ka jingsngew khia halor ka jingbym biang ka rukom siew bai kit ki karkhana dewbilat bad halor kane ka la pynbna ban pynlong da ka jingiakhih kaba khlem buh por ban khanglad ïa kito ki trok kiba wan na bar kiba ju kit dewbilat bad kit clinker, na ka liang u President jong ka JAC u bah Biangshwa Shylla ula pyntip ba lada ka jingiakren pynbeit kaba un sa khot u Deputy Commissioner kam urlong katkum ka jingdawa, ka JAC kan ïaid beit shakhmat ban pynlong ïa ka jingiakhih kaba khlem buh por.