Ba kiew First Division, pynkup burom ka NPP ïa ki nongïalehkai kriket ka Lawsohtun

Shillong, Nailur 07: Ka National People’s Party Lawsohtun Unit ha ka janmiet sngi Saitjaiñ ka la pynkup burom ïa ki rangïalehkai kriket jong ka Lawsohtun United Sports Social & Cultural Organisation namar ka jinglah jong ki ban kiew sha ka kyrdan First Division jong ka Shillong Cricket Association Cricket League mynta ka samoi.
ïa kine ki rangïalehkai la pynkup burom da u Chief Adviser jong u Myntri Rangbah ba dei ruh u Working President ka National People’s Party Bah Hamlet Dohling, ryngkat u Rangbah Shnong ka Lawsohtun, ki nongïalam ka NPP Lawsohtun, ki nongïalam shnong bad ki paidbah nongshong shnong.
Haba kren ha ka jingïalang u Bah Hamlet Dohling u la ai ka jingïaroh ïa ka kynhun ïalehkai kriket jong ka Lawsohtun kaba la kiew kyrdan arted ha kine ki arsnem na ka Third Division sha ka Second Division bad mynta sha ka First Division.
Kum ka jingai mynsiem, u Bah Hamlet u la aiti ruh ïa ka work order kaba lai lak tyngka sha ka club khnang ba kin lah ban pyntyllun ïa ki kam na ka bynta ban kyntiew shuh shuh ïa ki kam ïalehkai ha ka thaiñ.
Shuwa kane, u Bah Hamlet u la ong ba kano kano ka shnong kaba don bun ki nongïalehkai kiba mihkhmat ka dei ka shnong kaba koit kaba khiah bad kaba lait na shi bun ki jingsniew jong kane ka pyrthei. “Nga dei uba kloi bad uba hajan tam ban kyrshan ïa kano kano ka shnong kaba ïakhun ban kyntiew ïa ka sports bad kiba don ïa ka thong ban leh ïa kaba bha,” u la ong.
Na ka liang u Rangbah Shnong Bah Harrybirth Rynjah u la pynpaw ka jingkmen ba ka klob ka la kiew stet na ka Third Division sha ka Second Division bad mynta pat sha ka First Division. U la ïaroh ruh ïa ka mynsiem ïarap jong u MLA barim uba dang bteng ban kyrshan ïa ka shnong bad ka bit ka biang jong ka shnong khlem da kyrngah.
U kapten ka kynhun Bah Hilarius Thabah ha ka jingkren ba lyngkot u la pynpaw ka jingsngewnguh ïa u Bah Hamlet ba ki la ïoh ïa katei ka burom kaba kim pat ju ïoh mynno mynno ruh kum ki nongïalehkai kriket. U ong ruh ba da kane ka jingpynkup burom mynta ki paidbah kin sa ithuh noh ïa ki ba ki dei ki nongïalehkai kriket kiba mihkhmat ïa ka shnong baroh shi katta.
Ha kane ka sngi la ïoh ruh ïa ka jingkren na u Bah R Wankhar bad Bah F Lyngshiang kiba dei ki nongïalam ba hakhmat ka NPP Lawsohtun. La pynshongkun ïa ka jingïalang da ka jingshim bynta lang ki Seng Kynthei, ki samla bad kumjuh ki nongshong shnong.