Ba khlem sam um la palat taïew, pynduh ka sorkar ïa ka hok ki paidbah ka Shillong, kynthoh ka VPP

Shillong, Nohprah 17: Ka Voice of the People Party (VPP) ka la pynrem jur ïa ka jingleh kaba khlem pyrkhat jong ka sorkar ban pynduh ïa ki hok jong ki nongshong shnong ka Nongbah Shillong ban pynduh ïa ka jingsam umbam umdih kaba la palat taïew.
Katkum ka kyrwoh khubor ba la phah da u nongai ktien ka VPP u Dr. Batskhem Myrboh u la ong ba ka long kaba sngewthuh haba wan ki jingjia kiba long kyrkieh kiba lah ban mih ha kano kano ka por hynrei ka jingjubab jong ka sorkar na ka bynta ka bha ka miat ban ai ka jingshakri ïa ki paidbah kam dei ban pynlong bad leh ha ka jingmut jingpyrkhat jong ka jinglong kyrkieh.
“Naba ka jingpynïoh ïa ka umbam umdih ka dei ruh ka hok jong ka jingim, ka sorkar ka dei ban shim khia ïa kane ka kam da ka jingkitkhlieh ban ïada ïa ki paidbah na ki jingeh kiba khraw. Ka tnat kaba dei peit ka la dei ban trei borbah na ka bynta ka jingpynbeit kaba shipor ban lah ban sam ïa ka umbam umdih sha ki paidbah kum ha kane ka por ba ki mad ïa ki jingeh,” ong u Dr. Myrboh.