Ba khlad u khynnah kyrni drug, shah khot hajir u Secretary ka HYC ha ki Pulit ka thanad Sadar

Shillong, K’Lyngkot 21: U Secretary ka Hynniewtep Youth Council (HYC) u Bah Isaac Basaiawmoit mynta ka sngi u la shah khot hajir ha Sadar Police Station, hadien ka jingkhlad jong u wei u khynnah uba la kyrni bha ha u drug namar ka jingshah bom haduh ban da ïap.
Ha ka por ba leit sha Sadar Police Station ïa u Bah Isaac la synran lang da ki nongialam bad ki dkhot jong ka HYC bad kane ka jingshah khot hajir kam shym la shim por kumba la jia ha kiwei pat ki por kiba la dep.
Haba kren sha ki lad pathai khubor u Bah Isaac Basaiawmoit u la ong, ha ka ejahar ba la ujor ka kyrteng ïa ngi ne ïa ka seng hynrei namar ki don kiba bishni ïa ki kam ba ngi trei ki kynshoit nadien nadien kiba kynnoh ba dei ma ngi kiba don bynta.
“Ha ka jingïa kynduh mar khmat bad ki pulit hadien ba kila kylli, ngi la pynpaw ba kam don ei ei kaba kum kata namar ba na ka liang jong ka seng kam shym la shoh ne bom ïap ïa uta u khynnah” ong u Bah Isaac.
Shuh shuh u Bah Isaac u la ong, “Ki don kiba briew kiba nadien kiba kynshoit ïa kata ka long ïing ban ong ba dei ma ngi ki ba don bynta ha kane ka kam” u la ong.
U Bah Isaac u la ïathuh ba une u khynnah u shah shoh ha MUDA bad kadei ha ka 23 tarik u bnai Naiwieng jong u snem 2025 bad u la khlad noh ha ka 4 tarik u bnai Nohprah 2025 hapoh Nazareth Hospital.
Shuh shuh u Bah Isaac u la iathuh ba ki pulit ruh tip ba ngim dei ki briew kiba kum kita namar haba ngi leh, ngi leh ha ba shit bad haba shai bad ngim bom haduh ban duh ïa ka mynsiem, hynrei ki pulit ki ong ba ki hap ban shu pyndep ïa ka kamram namar la don ka jingbthah ba ki don ki briew kiba kynshoit ba ngi don bynta ma ngi.