Shillong, Naitung 03 : Ka Sur Paidbah na South West Khasi Hills District ha ka sngi Baar ki la kynduh ïa u Symbud Myntri Rangbah ka Jylla, Bah Prestone Tynsong ban pynsngew ha u halor ka jingjynjar ba ka thaiñ ka kynduh na ka daw ka jingsniew bad ka jingkhim palat ki surok.
Haba kren bad ki lad pathai khubor u chairman ka kynhun Bah Kitborlang Nongrem u ïathuh ba ha ka jingïalang paidbah kaba long ha ka 15tarik Jylliew baroh ki paidbah na kylleng ka distrik ki la rai ban pynsngew sha ka sorkar halor ka jinglong jingman jong ka surok Weiloi- Mawkyrwat- Ranikor bad ruh na ka surok Weiloi – Khatphra Ranikor lyngba ka surok Mawsynram kaba la shu ieh kumto la slem bha.
“Ka surok Weiloi – Mawkyrwat – Ranikor kadei ka surok kaba la sniew tam lada nujor bad kiwei ki surok kiba pynïasoh ïa ki distrik bad ka nongbah Shillong. Kane kadei ruh ka surok kaba rim tam ha ka jylla kaba dang neh kum ka surok rit haduh mynta mynne,” ong u Chairman ka kynhun Bah Kitborlang Nongrem haba kren bad ki lad pathai khubor.
Shuh shuh u la ong ba katei ka surok kadei kaba la jur bha ka leit ka wan naba ka pynïasoh ym tang ïa ka distrik bad ka nongbah Shillong hynrei ruh bad ki khappud jong ka ri ba marjan.
Ka Synjuk ka la pynpaw ruh ba na ka por sha ka por ki kynhun la ka long na ki nongïalam shnong, ki seng bad kiwei kiwei ki ju pynsngew sha ka sorkar halor kane ka mat hynrei ka kam ka dang sahteng haduh mynta mynne.
La kdew ruh ba ka surok Weiloi – Khatphra Ranikor lyngba ka Mawsynram kadei kawei pat ka surok kaba kongsan tam ha ka thain na bynta ka khaii pateng jong ki paidbah kumta ka donkam ban pynheh pynïar bad pynbha shuh shuh.
La pynpaw ruh ba ha ka jingïalang la rai ban pynsngew ba ki paidbah ki kloi ban pdiang da ka surok Intermediate lane lada jia ba ym pat lah ban pynpoi da ka surok Two-Lane.
U Chairman u la ïathuh ruh ba la pyntip ïa ki ba ïa kitei ki surok baroh ar tylli lah ban shna da ka jingkyrshan pisa na ka World Bank. La ïathuh ruh ba ka kam kaba sah mynta ka long satang ka jingsoi soskular hapdeng ka sorkar Meghalaya – sorkar India bad ka World Bank.
U ong ruh ba kum ka kynhun ki sngewkmen hadien ba u Symbud Myntri Rangbah u la ai ka jingkular ba ïa kitei ki surok yn sa pynbha da ka jingkyrshan pisa na ka World Bank.
