Ba kharoi sted u drok ha ka jylla, dei ban pyntreikam mardor ïa ka ILP: MLA North Shillong

Shillong Rymphang 01: U MLA ka 17th North Shillong Constituency u Bah Adelbert Nongrum u la ong ba ka jingroi sted jong u drok ha kane ka jylla Meghalaya kadei namarba ka sorkar jylla kam don mon ban khang ïa ka jingïoh rung jong une u jait jingdih pynbuaid ba sniew ha ka jylla bad dei halor kane ba la donkam kyrkieh ban pyntreikam noh mardor ïa ka ILP ha kane ka jylla.
Ïa kane u la ong haba kren kum u kongsan ha ka prokram rakhe pynhab pyrda noh jong ka Riatsamthiah Sports and Cultural club ïa ka platinum Jubilee ne ka jingrakhe jingdap 75 snem jong ka ha ka sngi Saitjaiñ.
U MLA u la ong ba watla kane jingkren jong u kam dei satia ban mih ha kane ka rynsan rakhe dap 75 snem ka club, hynrei namarba la ïohi ba ka dei ka jingshisha ba la kharoi palat u drok ha kane ka jylla kumta um banse ban kren ïa kane ka phang bad ka mat kaba kongsan jong ka imlang sahlang.
U la bynrap shuh shuh da kaba ong, “Ka sorkar ba mynta kam don ïa ka mon saiñ pyrthei ne saiñ hima Sima ban khang naba dei ban khang bad halor kane ba la shu ïoh rung laitlan kiba khaïi drok ha kane ka ri ba ieid jong ngi, ngin leh aïu hapdeng kane ka jingeh, wat lada ngi pynbiang ïa ki tup ki man, ki tank, ki kuli ki suloi, lada ka jingkhang pat ka plie baroh shi sngi shi miet, bad ki rung keiñ sha kane ka jylla jong ngi bad kane ka don ka jingma naba ngim ju ïohi shuh ïa ki dien mih jong ki naba la ïohi tang ïa ki dienjat rung jong ki, ba ki rung.”
Kumta halor kane ka jingma na ka liang u MLA ula pynpaw ïa ka jingkhmih lynti na ka sorkar Meghalaya bad ka sorkar Pdeng ba kin pyntreikam noh kyrkieh ïa ka Inner line permit (ILP) kaba donkam khnang ba yn lah ban pynneh pynsah ïa ka riti dustur ka kolshor ne ka jingim tynrai ki trai ri trai muluk khnang ba kan ym duh noh.
“Nga kyrpad ba phin duwai lem namar mynta satang katto katne sngi kan sa sdang ka dorbar mang tyngka ka jylla khnang ban ïoh ïakren ïa ka Reservation Policy kaba ktah kyrpang ïa ki khun samla ka jaitbynriew haba ïadei ym tang ha ka ïohkam ïohjam sorkar hynrei khamtam ka Academic, khnang ba ngan lah ban leh ïa kaba donkam, namar ngam lah shuh ban ïapeiñ ïa ki khun samla jong ngi ban shaniah beit tang ha ki kam sorkar hynrei ban ïeng ha la ki jong ki kjat na ka bynta ki kam lajong bad ban ruh ki nongai kam,” ong u Bah Nongrum.
Haba phai pat sha ka jingpynhab pyrda jong ka Riatsamthiah Sports and Cultural club u la ong ba ka shong nongrim haba ïakren ïa ka sports naba ka tei ïa ka jinglong ba janai jong ka met, ka mynsiem bad ka jingïatreilang hapoh ka kynhun, katba ka kolshor ka pynneh ïa ka jingithuh bad ki jingkordor jong kine kiba ym lah satia ban pynïakhlad naba ha ki kam ïalehkai hap mad ïa ki jingshah rem bad ïoh ruh ki jingjop.
U MLA u la ai khublei ruh ïa ki nongkitkam ka club ba ki la lah ban pynim biang ïa ka sports and Cultural club ka Riatsamthiah bad pynpaw ka jingngeit kaba skhem ba kum ki nongthaw aiñ yn shim ka jingkitkhlieh bad ka deiti kumno ban lah kyntiew ïa ki khun samla ha ki sap ki phong lyngba ki jingïalehkai bapher bapher kiba ju smat ban pyndonkam bha da ki samla bad ki hep kiba rit.