Shillong, Rymphang 16: Ka Hynñiewtrep Youth’ Council (HYC) ha ka sngi Nyngkong ka la ther tyngeh ïa u President ka Congress Bah Vincent H Pala halor ka jingkam ba ka thaiñ khappud bad ka ri Bangladesh ka long kaba la shngaiñ bad ka jingsheptieng ïa ka jingwan rung kyrthep ka dei tang ka jingsngew, haba kam ba kane ka jingkren kadei ka bym don satia ka jingkitkhlieh bad ka bym ïahap ruh bad ka jingshisha.
Katkum ka kyrwoh khubor, u President ka HYC u Bah Roy Kupar Synrem ula ong ba ka jingkren u Bah Pala kadei tang ka jingñiew beiñ ïa ka jingshisha kaba mad da ki jaidbynriew trai ri trai muluk.
U la ong, “Ban kam ba ka thaiñ khappud ne International Border ka long kaba la shngaiñ pura, kadei tang ka jingñiew beiñ ïa ka jingmad ba shisha jong ki jaidbynriew trai ri trai muluk jong ka Meghalaya.”
U Bah Synrem u la ai nuksa ba ka jingrung tuh ha ki jaka khlaw kiba rben ha ka khappud jong ka ri Bangladesh bad India, ka jingdon ia ki kot ki sla thok, ka jingwan kyntur pud ïa ki khlaw ki btap bad ki jaka jong ka jaidbynriew bad ka jingkiew jong ka jinglong jingman ka jaka na ka jingbuhai ki briew ka la long kawei na ki jingeh ba mad manla ka por.
U la buh jingkylli da kaba ong, “Lada ka thaiñ khappud kadei shisha kaba la shngaiñ pura, balei ka don ka jingïai bteng ban kurup, kem bad ban phah leit phai biang ïa kiba wan rung tuh ka dang ïai jia? Balei ki nongshong shnong ha khappud bad ki sengbhalang ki ïai bteng ban long kiba peitngor?.
Na ka liang ka HYC ka la kynnoh ba u Bah Pala ula ai mynsiem ïa ka kam rungtuh bad ban pynduna noh ïa ka jingsheptieng kaba shisha.
“Ban pynduh ïa ka jingsyier jong ki paid trai ri trai muluk kadei tang ka jingïalam bakla bad kadei tang ka jingpynsngewthuh bakla ïa ka jaidbynriew kaba ïakhun na ka bynta ban ïada ïa la ka jaka, jinglong trai bad ïa ka hok ha ka kam saiñ pyrthei” bynrap u Bah Roy.
Halor kane, na ka liang ka seng ka la buh ruh ka jingkylli da kaba ong ba u ai jingmyntoi ïano ban kren kumtei, hato kane kadei ka jingpyrshang ban leh politik ïa ka jingma kaba shisha jong ka ri bad ïa ka mat jingïakhun ka jaidbynriew?.
Ka seng ka bynrap ba ka jingkren u Bah Pala ka la buh ïa u bad ïa ka seng ha ka jinglehraiñ hakhmat jong ki jaidbynriew trai ri ka jylla Meghalaya bad ka la pynkynmaw ïa u ba ym shym la kren na ka bynta ka sorkar.
U la ong, “Ka jingïakhun ban neh ban sah ki jaidbynriew trai ri ka Meghalaya kam dei satia tang ka jingmutdur. Kadei ka jingshisha kaba dawa ban leh da ka kam.”
