Khliehriat Naitung 7: Ka jinglong jingman ka surok national highway ha ki thaiñ Ratacherra bad ha Malidor ka dang buh jingeh ïa ki nongleit nongwan bad ka buh jingma ruh na ka daw ka jingjur palat ka jingjyrsieh ka surok kaba dap tang da ka khyndew bad ka ktieh, kane ka jingsniew palat ka surok ka wanrah ruh ïa ka jingdheng kali kaba jur bha kaba neh bun bun kynta ha katei ka thaiñ Malidor bad Ratacherra.
Ki thymmei khubor ki ïathuh ba ki ju don ki kali kiba sahkut ha ka jyrsieh khamtam ki kali rit kiba ïaid lyngba na kane ka surok na Malidor, ka jingdheng kali kaba neh da ki bun kynta ka pynlynga bad pynkordit haduh katta katta ïa ki nongleit nongwan.
Kumba baroh ki tip ba ka national highway East Jaiñtia Hills District ka dei kaba pyniasoh bad kiba bun tylli ki jylla kiba don ha ka thaiñ shatei lam mihngi kum ka Assam, Nagaland, Mizoram, Manipur bad kiwei kiwei ki jylla, kumta da ki hajar tylli ki kali ki ju iaid lyngba na kane ka surok bad kane ka jingjyrsieh kaba buh jingeh ïa ki paidbah nongleit nongwan man ka sngi man ka por.
