Nongpoh, Ïaiong 26: Ban ïa don bynta lang ha kaba kit ba bah ïa ka eh ka shong ki paidbah hapoh ka shnong ka thaw bad hapoh ka imlang ka sahlang, ki Longkmie jong ka Shnong Khlieh Umwang ba hap ha ka Raid Nongtung ha ka thaiñ Khappud, ha ka lama ka Lumlang Village Organization ki la mih paidbah ban maramot ïa ka surok paidbah ba hap ha katei ka shnong Khliehumwang.
Ïa kane ka jingmaramot ïa kane ka surok la pynlong hynnin ka sngi Baar jong ka taiew ha ka jingïalam ka Lumlang Village Organization bad da ki phew ngut ki Longkmie bad ba la kyrshan ruh da ki riew rangbah bad ki samla ki la mih ban maramot ïa katei ka surok ïaid kali ba hap hapoh u pud u sam ka Shnong Khlieh Umwang.
Kane ka jingmih kine ki Longkmie ban maramot ïa katei ka surok, ka dei ruh halor ka nongrim ba ki sngewkhia halor ka jingsniew palat ka surok, ba ka sorkar kam pat phai khmat haduh kine ki sngi ba kum ki paidbah ha khappud kim pat ioh satia kata ka surok rong bad ki hap ban ïaid lyngba ka surok khyndew kaba dap tang da ki thliew ki syar suda.
Kane ka shnong Khlieh Umwang ka la don kumba 300 ki tnum ïing bad haba phai sha ki kam pynroi ki dang shah iehnoh beiñ bad khamtam haduh kine ki sngi kim pat ioh wat ïa surok rong ban suk ha ka leit ka wan.
Da ka mynsiem jong ka jingïakit ïabah lang ïa ka eh ka shon ki paidbah, ki Longkmie ha ka jingïalam ka Kong Meribell Shadap bad kiwei ki longkmie ki la mih ban pynbha ïa kane ka surok shi bynta ban pynsuk ïa ka leit ka wan ki paidbah ba haduh kine ki sngi ka jingangnud jongki ban ioh noh da ka surok kam shym la urlong ba ka sorkar Meghalaya kam ju phai khmat ïa ka jingeh ki paidbah ha katei ka shnong khappud.
