Ba jyllei kiba thang dusmon ïa ki lum ngin leh da kaba tyngeh, ong u president ka RWEPA

Nongstoiñ, K’lyngkot 15: Ka jingjyllei jong ki briew kiba thang dusmon ïa ki lum bad ki khlaw ki btap ka la pynlong ïa ki nongïalam bad ki dkhot jong ka Rwiang Wildlife & Environmental Protection Association (RWEPA) ba kan sngewkhia bad ban buh ruh da ka jing maham kaba tyngeh, ong u Bah Wilonly Thongni president jong ka Association haba ïakren bad u nongthoh khubor mynta ka sngi.
U tei u nongïalam ka Association u la ong ruh ba katei ka kynhun ka dei kaba la thaw da ki rangbah jong ki khatwei tylli ki shnong kiba don ha ka thaiñ Rwiang ba kynthup naduh Rwiang, Tiniang, Kraingrin, Mawruksoiñ, Thiepjaphlang, Tumtum, Patharkhang, Seiñduli, Shiliangrynñiaw, Tlon bad Umshynrut.
U la ong ruh ba man la u snem ka Association ka ju pynbna paidbah lyngba ki lad pathai khubor ba ka Association ka buh da ki kyndon kiba tyngeh bad kiba pyrkhing bha ba ym bit ban siat pynïap ïa ki mrad ki mreng kum ki skei, ki sñiangkhlaw, ki rabit, shrieh, ki tngaw bad baroh ki jait mard bad kumjuh ruh ïa ki sim ki doh bad ki jait syiar khlaw kiba don ha katei ka thaiñ, nalor kata ki la khang pyrshah ruh ban pynïap pathar ïa ki don um doh wah da kaba siat bom, khangjar, wieh da ki kynja dawai bih bad kiwei kiwei ha baroh ki wah kiba don sawdong jong kitei ki shnong.
U la ïathuh ruh ba katei ka synjuk ka la trei kam la palat shiphew snem ha katei ka thaiñ bad haba lap ba ki lum bad ki khlaw ki btap ki la shah thang ki ju buddien ban lap ïa kiba don kti hynrei ka long kaba shitom haduh katta katta ban lap namar ki briew kiba smat ban thang dusmon ïa ki lum bad ki khlaw ki btap kim ju shlan ban mih katba dang ïohsmgew ba ki don ki briew hajan ki jaka ba ki thang dusmon bad wat haduh ban da dum ruh ki lah ban phet rieh.
Ha kajuh ka por u la ong ba ki nongkitkam bad ki dkhot jong katei ka synjuk ki ju peitngor bha ïoh lehse ki don ki briew kiba rung ha ki khlaw ki btap kiba thmu ban leit siat mrad.
Utei u nongïalam u la ïathuh ruh ba na ka liang ka synjuk ka kyntu jur ïa ki paitbah nongshong shnong ka thaiñ ba kin ïatrei lang khnang ba yn lah ban khanglad ïa ki riew shim kabu. Nalor kata u la ong ruh ba ka synjuk ka kyntu ruh ïa ki trai jong ki khlaw ki btap ha katei ka thaiñ kin ïaleh katba lah ban ym pom pathar ïa ki dieng ki siej bad ba kin kiar katba lah na ka jingthang rnga namar ka ktah haduh katta katta ïa ka mariang.
U la ong ruh ba ka synjuk ka kyntu ba lada ki kwah ban pom dieng ruh ki dei ban da bishar bha kiba kum kino ki jait dieng kiba la long ban pom ym ban shu pynkyllon naphang ïa ki dieng kiba dang kham rit ruh khnang ba ki mrad ki mreng bad ki sim ki doh kin dang ïoh jaka ban rieh bad ban shong ban sah.
Khatduh eh u la ong ba nangne shakhmat ka synjuk kan thaw ki lad ki lynti ban phah buddien lada don ki ba thang dusmon ïa ki lum lane lada lap ba ka don ka jingpynïap pathar ïa ki don um doh wah bad lada lap ïa kino kino ki briew kiba pynkheiñ ïa ki kyndon jong ka Association kan shim bishar shuwa bad hadien ba ka la bishar bad daiñ kuna katkum ba la buh ha ki kyndon kan sa aiti ha ki bor ka aiñ ba kan leh ïa kaba donkam.