Shillong, Naitung 20 : Ka Seng Samla Mawlai Pylun ha ka sngi Baar ka la leit ban kyrpad ïa u Myntri ba peit ïa ka tnad Poh Ïing jong ka sorkar jylla u Bah Lahkmen Rymbui ba ka sorkar kan buh ïa ki jaka ai jingsumar ïa ki samla jong ka shnong Mawlai kiba la ngop ha ka jingkyrni ha u Drok namar ba kiba bun ki samla kiba wan na ka long ïing baduk kim kot bor ban phah ai jingsumar ïa lade ha ki jaka ai jingsumar shimet namar ka jingrem than ka bai sumar bad ruh seng ka kyrpad ba ka sorkar kan buh ruh ïa ka kynhun ki pulit talasi drok ne Anti Narcotic Task Force(ANTF) ha Mawlai.
Haba kren sha ki lad pathai khubor u Bah Samuel Biam President ka Seng Samla Mawlai Pyllun(SSMP) u la ïathuh ba kane ka jingkyrpad na u Myntri ba ka sorkar kan ban buh ïa ka jaka ai jingsumar ïa kiba la kyrni ha u drok ne ki Rehabilitation Centre kan pynïaid da ka sorkar lynba ka tnad Social Welfare namar ka jingbym kot bor ki ba wan na ka long ïing ba duk ban leit shah ai jingsumar ha ki jaka ba pynïaid da ki riew shimet na ka daw ka jingrem than ka bai sumar jong ki.
Haba ïadei bad kane u Bah Samuel u la ïathuh ba na ka liang ka u myntri u la kular ban pan ka jingïatrei lang na ki riew shimet kiba pynïaid ïa kine ki jaka ai jingsumar namar ba kan buh jingeh ïa ka sorkar ban pynïaid hi bad ba kan ïateh bad bei pisa ïa kine ki jaka ai jingsumar shimet ïathuh u bah Samuel.
“Lada ka sorkar ka lah ban rat dyngkhong ïa ki seng kaikhlaw balei kam lah ban rat dyngkhong ïa u drok. Ka jingjyllei u drok ka la ktah ïa ki samla ka shnong ka thaw khamtam eh ïa kito kiba wan na ka ïing kaba duk ha kaba ki hap wat ban tuh ban ioh thied drok ban pynhun ïa ka jingbrai ka met jong ki” ong u Bah Samuel
Shuh shuh u Bah Samuel u la ïathuh ruh ba ka seng ka la buh jingkyrpad ha u Myntri ba un buh noh ïa ka kynhun ki pulit talasi drok ne ANTF namar ka jingjyllei ki kam khaïi bad dih drok ha Mawlai.
“Kane ka jingkyrpad jong ngi ban buh noh ïa ka ANTF ha Mawlai namar lada ka sorkar ka khmih lynti beit tang ha ki pulit na Thanat Mawlai kin ym lah shuh namar ka jingkhia ka kam kaba ki hap peit” ong u Bah Samuel
