Jowai, Nailur 28: Ka seng jong ki nongñiah kali kamai (Local Taxi) ha Jowai kaba la tip kum ka West Jaiñtia Hills Taxi Owner’s & Driver’s Association (WJHTODA) hynnin ka sngi hapoh ka jingïalam u General Secretary ka seng kila leit ban ïa kynduh ïa u Deputy Commissioner ka West Jaiñtia Hills District ban pynsngew halor ka jingeh kaba ki ïakynnduh na ka jingbun palat ki ‘Speed Breaker’ na Newhill haduh Mihmyntdu.
Ka seng ha ka jingïakren bad utei u khliehduh ka District ula kular ban shim khia ïa kane da kaba yn jurip bniah ïa kane ka jingeh bad yn weng noh ïa ki lada donkam. Shuh shuh ka seng kala ong naduh ba la buh ïa kitei ki Speed Breaker kala wanrah shisha ïa ka jingthut ha ka liang ka wan jong ki paidbah.
Kane kala wanrah ruh ka jingsahkut kali kaba jur bha kaba la ktah lang naduh ki khynnah skul, ki nongtrei ophis bad kiwei de haduh ba kim shem la poi shuh ha ka por kaba biang, ha ka juh ka por la pynsngew ba kane ka la ktah eh ïa kitei ki nongñiah kali kamai Taxi kaba la pynduh nong ïa ka kamai jong ki namar ka jingsah kut kali.
Na ka liang ka seng ka buh ka jingkyrpad na u DC ba un shim khia mardor ïa kane ka jingeh ki paidbah nongleit nongwan, khnang ba kane kan pynsuk ïa baroh lang, pynkut ka kyrwoh na u General Secretary ma Nangteibor Shangpliang.
