Shillong, Jylliew 16 : Ka Synjuk Ki Nongsynshar Shnong Upper Shillong ( SNSUP) mynta ka sngi Nyngkong ka la ïa kynduh bad ka Deputy Commissioner jong ka East Khasi Hills, Kong RM Kurbah ryngkat ka jingïadonlang u Superintendent of Police kumjuh u Addl SP Traffic, BDO Mylliem, Magistrate, Area Manager ka NHIDCL bad kiwei de ban pynsngew halor ka jingjur palat ka dheng kali ha ka thain Upper Shillong naduh jingkieng Umshyrpi ter ter haduh 7 Mer.
Ka Synjuk ka la kyrpad jur ïa ka DC ba kan leh eiei halor kane namar ki paidbah ym tang na ka thain upper Shillong hynrei naduh West Khasi Hills, na ka thaiñ Pynursla, Sohra bad shaduh Sor Shillong ki la shah ktah lut.
Katkum ka jingïathuh da u Adviser jong ka Synjuk Bah Daniel Thangkhiew , la pyntip ruh ha ka DC bad ha ki heh pulit ba kane ka la buh jingeh ïa kiba bun khamtam ki Ambulance bad kali private ba kit nongpang, ki khynnah skul, ki nong ïew bad ki nongtrei sorkar ruh kumjuh.
Na ka liang ka Synjuk ki la pynpaw ruh ïa ka jingisynei naba bun ki paidbah ki hap hiar noh na ki kali kamai ban ïaid da ka kjat naduh Laimer shaduh sha sor bad ki hap ban leit pynjhieh ruh harud surok bym biang ki painkhana ne bym don ki petrol pump hajan ban leit bar.
“Na ka liang ka DC ka la mynjur ban ïa leit jurip lang markhmat ha ka step sngi Ba-ar ha ka jingïadonlang ki nongïalam ka Synjuk, na ka liang ka NHIDCL, BDO, ADC EKH, Traffic Police bad kiwei ki tnad ka ban sdang na jingkieng Umshyrpi shaduh Laimer ter ter,” la ïathuh shuh shuh u Bah Daniel Thangkhiew.
