Ba jur ki jingaksiden kali khreh pynkhie im biang ka sorkar ïa ka Road Safety Board

Shillong, Rymphang 27: Namar ba la nang kiew ki jingjia aksident ha ki surok u Symbud Myntri Rangbah ba khmih ïa ka tnat kam pohïing (Police) u Bah Prestone Tynsong u la kubur ïa ka jingsngewkhia haba ïadei bad ka jingshngaiñ ha surok, haba pynpaw ba ka Sorkar ka angnud ban pynim biang ïa ka jingtreikam ka State Road Safety Board kat kum ka Motor Vehicle Act, ban tehlakam ïa ki jingjia aksiden.
Haba jubab ïa ka cut motion, u Bah Prestone u la ong, “Ngi la ïohi ïa ka jinglong jingman ha surok bad ka jingsngewkhia jur namar jan man la ka sngi ki jingjia aksident ki jia ha ka jylla.”
U Bah Prestone u la pynshong nongrim ba ki don bun ki daw ba jia aksiden bad u la ban jur ïa ka jingdonkam ban don ka jingïatreilang hapdeng ki Tnad ba don bynta ha kane ka kam.
“Ngin sa bishar bniah biang ban pynim ïa ka jingtreikam jong kane ka Board shisien ba la bishar bniah biang, ngin sa lah ban pynduna ïa ki jingjia aksident” la ong u Bah Prestone da kaba pynpaw ba ula shimkhia ïa ki jingai jingmut ki dkhot ka ïing Dorbar.
Haba ïadei bad ka jingjur ka jingdheng kali, u Bah Prestone u la ong ba ki jingeh jong ka nongbah Shillong ka dei kaba lah slem bad kiba pur shaduh ki nongbah jong ki district.
“Ngi kwah ba ki pulit kin pynkhlaiñ ne thaw shuh shuh ïa ki tnat Traffic ban pynbeit ïa ka leit ka wan bad ban weng ïa ka jingdheng kali” ula ong.
U Bah Prestone u la ban jur ïa ka jingdonkam ban pynshitom daka ba daiñ kuna ïa kiba pynkheiñ ïa ka aiñ niah kali.
“Nga hi nga sngew ba ka jingpynshitom ka dei ban long kaba kongsan,ngi donkam ban pynbor ïa ki nongniah kali ban bud ïa ki aiñ niah kali”.
U la kyrpad ïa ka jingïatreilang jong ki paidbah, da kaba ong, “Ki nongñiah kali ki dei ban shim ia ka jingkitkhlieh baroh kawei ban pynthikna ba ki jingjia ba sngewsih na ka jingjia aksident kan nym jia.”