Ba jur ka jingtih maw beaiñ ha Rani, ym tang ba duhnong ka sorkar ka ktah ruh ïa ka jingjot ka mariang

Nongpoh, Naitung 07 : Ka jingjur ka jingtih maw bad ki kor tylliat maw beaiñ ha Rani kaba dei ka shnong khappud hadpeng ka Meghalaya bad ka Assam ka la ktah shisha ym tang ba ka sorkar kan duhnong ha ka liang ka khajna bad kane ka wan rah ruh ïa ka jingpynjot ba shyrkhei ïa ka mariang.
Haba kren halor kane ka jingtih maw beaiñ ne ka jingdon ki Kor tylliat maw beaiñ dang shen ka sorkar jylla ka la dep phah ruh ïa ka kaiphod sha ka NGT ba ka la pynjari da ka kuna kaba long T. 153 klur ïa ki 133 tylli ki jaka tih maw bad ki kor tylliat maw ha ka jylla bad bun na kine ki dei ha Ri Bhoi District.
Kane ka dei halor ka jingioh lum jingtip kiba dei shaphang ki par maw (Stone Quarry) bad ki kor tylliat maw (Stone Crusher) kiba pyntreikam ha ka jylla bad ha ka jingbuddien ha Ri Bhoi ki dang don bun ki par maw bad ki kot tylliat maw kiba pyntreikam beaiñ khlem pat ioh bor na ka sorkar khamtam ha Rani kaba dei ka shnong khappud ka jur ka jingtih maw bad ka jingshalan beaiñ ïa ki maw sha Assam kaba long ka jingduhnoing kaba khraw ïa ka sorkar ha ka liang ka khajna.
Haba leit ban jurip ha Rani ka la iohi bad lap shisha ba ka jingtih maw ha katei ka jaka ban shalan sha Assam ka la buh jingma shisha ïa ka sorkar bad ym lah ban tip haduh katno tylli kiba la ioh bor na ka sorkar Meghalaya bad katkum ka jingioh lum jingtip kiba bun hi ki la shu pyntrei beaiñ khlem pat da ioh jingbit na ka sorkar Meghalaya.
La ioh jingtip ruh lada don ka jingpyrkhing ki trai par maw ne ki kor tylliat maw ki ju sangeh ban treikam bad ki ju trei tuh tang ha ka por mynmiet, hynrei namar ba ym don ka jingtehlakam mynta ki la sdang ban pyntreikam ruh wat ha ka por mynsngi ha kaba ïa kane la sakhi haba la wan ban jurip da u Nongthoh Khubor sha katei ka shnong Rani kaba don ha khappud ka Meghalaya bad ka Assam.
Haba kren halor ka khajna ba dei ban ioh ka sorkar ka dei ban ioh lum khajna da ki klur tyngka bad dang shen ruh ki Nonghikai Adhoc ki hap ban mih madan ban dawa ïa ka la ka hok ban pynkiiew tulop ba ka sorkar ka shem jingeh shisha na ka jingduna pisa, hynrei haba phai pat ïa kum kine ki kam beaiñ ki jur bha ha kitei ki shnong khappud bad ka long ruh kaba sngewlyngngoh kumno kitei ki trai par maw bad ki trai jong ki kor tylliaw maw ki nud ban pyntreikam khlem pat da ioh jingbit na ka sorkar ha kaba ïa ki maw la shu shalan beaiñ sha Assam.
Kumba la sakhi ne lap bad lum jingtip da u Nongthoh khubor, kane ka jingdon kine ki paw maw beaiñ bad ki kot tylliat maw beaiñ ha katei ka shnong khappud ka ktah jur bha ïa ka sorkar Meghalaya, namar wat kiba trei ïa kane ka kam ruh ki dei na Assam bad ïa u Maw ruh la shalan sha Assam bad kaei kaba ka sorkar Meghalaya ka ioh kynduh ka dei tang ka jingduhnong ha ka liang ka khajna bad ka jingpynjot pathar ïa ka mariang ha kaba la iohi ba kumba ym don kita ki nongpeit nongkhmih na ka liang ka sorkar Meghalaya.