Ba jur ka jingshah shoh kiba nabar, ïaid pahara ki dkhot ka Dorbar Shnong Jaïaw Pyllun

Shillong, Naitung, 01: Ki dkhot jong ka Dorbar Pyllun Jaïaw kynthup ruh bad ki dkhot ka Seng Kynthei Jaïaw Langsning bad Jaïaw Pdeng ha ka miet sngi Saitjaiñ ki la ïaid pahara hadien ba ki la jia ki jingshah shoh bad ki jingshah ktah kti jong ki briew kiba nabar ka jylla kiba ju jia khah khah ha ki shnong kiba don ha ka jylli jong ka shnong Jaïaw Pylllun.
Dang ha kine ki khyndiat sngi, 11 ngut ki runar kiba donkti ban shoh pynmynsaw ïa ki arngut ki samla pule na Kerela ha Jaïaw Pdeng bad ïa ki nongbylla sngi hajan ka jingkieng Jaïaw Umpohliew bad kumjuh ruh ha ka thaiñ Mawlai ki la shah kem ha ki Pulit jong ka East Khasi Hills District bad napdeng kine kiba la shah kem, lai ngut ki dei kiba dang hapoh ka rta 18 snem.
U Chairman jong ka Dorbar Shnong Jaïaw Pyllun u Bah Pyntngen Dondor Nongrum ha ka jingïakren bad ki lad pathai khubor u la ong, “ka jingïaid pahara ka long hadien ba ki la mih ki jingthombor bad ki jingshoh pynmynsaw ïa ki briew kiba shu ïaid lynti khlem kano kano ka daw kiba la jia ha kine ki khyndiat sngi.”
“Ïa kano kano ka kam thombor, ka Dorbar Shnong Jaïaw Pyllun ka pynrem jur la ka long ka jingpynmynsaw bad ka jingpyndkoh ïa ki briew ka long kaei kaei kaba ngim lah satia ban pdiang,” u la ong.
U la ong ba ki jingïashoh ïadat ki wanrah tang ïa ki jingsngewsih. Ki bahaing hasem kiba khmihlynti ïa la ki bahaing hasem ban wanrah ïa u khaw sha la iing hynrei kin wan pynban da ka jingphlei snam, ngim lah ban pdiang bad ngi pyrshah jur ban shu shoh ïa kiba luilui, u la ong.
Haba kylli, u la ong, “kane ka jingïaid pahara ka dei tang ka jingsdang ban ïaid pahara jong ki san dorbar shnong da ka jingsynran lang jong ki Sengbhalang kiba don Unit ha ka shnong Jaïaw bad kynthup ruh ki Seng Samla.”
U la ong, “ki jingshah shoh ki ju jia khah khah. Ka long kaei kaei kaba pynbudnam ïa ka shnong jong ngi bad ngi sngewkmen ba ha ka 29 tarik, Jylliew ki Pulit ki la ïohkem ïa kiba donkti ban shoh pynmynsaw. Ngi la ïakren bad ki bor Pulit ban ïakren sani halor kane.”
“Da ka jingïatreilang ngin sa lah ban tehlakam ïa ki kam sniew,” la ong u Bah Nongrum.
“Ka jingpyndonkam ïa u drok ka shyrkhei bha bad ka buh jingma ym tang ïa ka shnong ka thaw bad ka jingjyllei u drok ka la kharoi,”u la ong bad bynrap, ngin sa ïakren bad ka tnat Pulit ban ïaid pahara ha shilynter ka surok Wahumkhrah namar ka jingdon jong ki kali kiba ju pynieng ha ka por mynmiet.