Ba jur ka jingïakynad ha Bangladesh phah ka sorkar pdeng ïa ka sorkar Meghalaya ban pyndep noh ka jingker sainar shiah ha khappud

By Mawphor Editor On May 29, 2025

Shillong, Jymmang 28 : Ka sorkar pdeng ka la bthah ïa ka sorkar Meghalaya ban pyndep kloi noh ka jingker sainar shiah ha shi lynter ki bynta khappud bad ka Bangladesh na ka daw ka jingïakynad bad jingkulmar kaba jur ha Bangladesh.
“ U Myntri Rangbah ka jylla u Conrad K Sangma dang shen u la ïakynduh ïa u Myntri kam pohïing ka sorkar pdeng u Amit Shah bad ïakren bad u halor ka kam ker sainar shiah ha khappud. Na ka liang ka tnad kam pohïing ka sorkar pdeng ka la bthah ïa ngi ba donkam ban pynsted bha kane ka jingker sainar shiah bad ka dei ban long da ka thong ne ka mission mode bad dei ruh ban pyndep kloi ka jingsiew bai jaka puta khnang ban ïoh sdang noh ïa ka kam” ong u Chief Secretary ka jylla bah D.P Wahlang.
U la ïathuh ba ki don katto katne ki diengpyngkiang ha kaba ïadei bad kane ka kam hapoh ka jylla, kawei ka long ba ki don katto katne ki trai jaka kiba ai mukotduma sha ïing bishar High Court bad donkam ban pynkhuid shwa ïa kane ka mukotduma. kaba ar pat ka dei ba ki don katto katne ki jaka ba dang ïaid ka jingpynshisha bad ïa kane la shaniah ha ki Deputy Commissioner ban leh ïa kaba donkam.
Ha kaba ïadei bad ka bynta kaba ar na ka liang ki DC ki la dep ai ïa ka Verification Certificate bad na ka liang jongka sorkar pdeng ka dang bishar bniah ïa ki kot ki sla shwa ba kan pyllait ïa ka pisa. Nga thikna ba tang shu pyllait ïa ka pisa ka kam kan sdang noh hi ong u bah Wahlang. Ha kaba ïadei bad bad ki mukotduma, ngi la kyrpad ïa ka ïing bishar ban shah ba ka jingtrei kan ïaid kata ba ka jingker sainar kan ïaid shakhmat watla ym pat dep shim bishar ïa kane ka kam ruh namar ka dei ka kam ïada ia ka suk ka sain jongka ri kumba long mynta.
U la ïathuh 75 haduh 80 % ka jingker sainar shiah ha khappud yn pyndep hapoh uune u snem. “ Ka bynta khappud jong ngi bad ka Bangladesh ka long haduh 443 Km bad ka jingker sainar ka dang dep tang 60 % bad 40% ka dang sah bad dang hap ban ïakren bad halor kane la don kumba 6-7 tylli ki jingïalang ba la khlieh hi da u myntri rangbah hi. Ngi ngeit skhem shwa ban kut une u snem ka jingker sainar kan poi beit sha ka 75 haduh 80 %”. ong u Chief Secretary.
“ Ha kito ki jaka ba pyrshah ki paidbah lane ki kwah ba ka jingker sainar kam dei ban long 150 Meter na u Zero Line hynrei ki dawa ba dei ban long beit na u Zero Line, halor kane ka jingïakren ka dang ïaid ha ka tnad kam pohïing ka sorkar pdeng bad kane ka jaka ruh kam da dei eh kaba jrong hynrei kaba lyngkot bha” ïathuh u Chief Secretary.
U la mynjur ruh ba ki khar Bangladesh ki shim kabu na kine ki jaka bym pat dep ker sainar ban ïoh rung suk sha Meghalaya.
“ Hooid ka dei ha kito ki jaka bym pat ker sainar shiah ba ki la shim kabu ban ïoh rung tuh sha India. Namar kim nud ban wan na ki khyrdop ba la buh namar kim biang ki kot ki sla. Wei ba la dep ker kim lah shuh ban ïoh rung sha Meghalaya, hynrei ki don pat ruh ki jaka kiba ym lah ban ker kata ha ki jaka ba ïaid kï wah bad kine ki jingeh kin dang ïai bteng beit hynrei donkam tang ban pynkhlaiñ ïa ki bor pahara khappud ha kum kita ki jaka.
U la ïathuh ruh ba ka sorkar ka ïa kynduh na ka por sha ka bor bad ki heh ka BSF ban ïakren halor kane ka kam khappud.
U la ïathuh ruh ba ha ka jingleit jngoh ïa ka Dalu u la ïohi bad sngewkhia bha ïa ka jinglong jingman ki bynta khappud ha katei ka jaka bad u la ïathuh ruh ba shen un sa leit sa sha Shella ban bishar bniah ïa kane ka juh ka kam.