Ba julor ka slab bad sahkut jaboh ha Jeep Stand, tuid lut ka um ktieh sha surok

Shillong, Naiwieng 28: Ka jingbret jaboh pathar ha ki Nala ka la long kawei na ki daw ba wanrah ïa ka jingsniew noh jong ki surok ha ka Nongbah Shillong bad ym tang katta kane ka pyntuid jaboh ruh ha ki Nala ka la wanrah ruh ka jingsahkut ki jaboh bad kaba wanrah ruh ïa ka jingsma iwtung ïa kiba ïaid ba ïeng.
Lah ban ong ruh ba ka jingbym pynkhuid ïa ki Nala ruh da ki bor badei peit ka long ruh ka daw na ka jingtuid ka um ba jaboh, kaba ktieh bad kumjuh ruh kaba sma bha haba ïaid ha ki lynti siengkien bad kumjuh ruh kane ka um kaba sma ka tuid ruh sha ki surok bad ki lynti ba ïaid ki briew ne paidbah.
Kawei na ki nuksa jong kane ka jingsah kut ki jaboh hapoh ka Nala ne ba ka um jaboh bad ba sma ka la hap ban tuid noh sha surok ïaid kali bad kaba ju ïaid ruh da ki paidbah, ka Nala kaba don ha Stand Jeep ne Garikhana Shillong.
Kane kane nalor ba la jingtap slab ka long kaba la paid bad kaba lada iaid ki briew ka lah ruh ban wanrah ka jingmynsaw naba ki briew khamtam ha ka por mynmied ki lah ban liat ha kane ka nala.
Kane ka Nala kadei kaba tuid napoh Ïewduh sha ka basa second hand ne basa die mar bad tiar jot bad mih sha stand jeep.
Na kane ka Nala lah ïohi ba baroh 24 kynta ka um kaba jaboh bad kaba ktieh ka tuid bad mih beit sha surok ïaid kali.
Ki briew kiba ïaid na kane ka jaka manla ka sngi ki mad ïa ka jingeh kaba khraw na ka daw ka jingsma iwtung bad ka jingdap ka ktieh hapoh ka surok kaba la wanrah ka jingeh kaba khraw ha ka ïaid ka ïeng bad ka kit ka bah.
Katei ka nala lah ban ong ba kadei kaba la sniew bad kaba shu tuid beit da ka um kaba ktieh hynrei kaba lyngngoh pat ka long ba ki bor badei peit khmih kim ïohi satia ïa kane ka jingsniew jong katei ka Nala bad ka jingeh ba mad da ki paidbah ba ïaid ba ïeng manla ka sngi na kane ka jaka bad ka surok.
Kumta ha kaba ïadei bad kane la donkam ïa ki bor badei khmih ban shim khia ban maramot pynbha ïa kane ka Nala khnang ba kan ym wanrah ka jingeh ïa ki paidbah kiba ïaid na kane ka surok bad kumjuh ruh ba ka um jaboh bad ki ñuit ba lang hapoh ka Nala kin ym sahkut sah hajuh.