Ba jia shah pynïap ki heprit, ki nongshong shnong kin hap long kiba peitngor bha ïa ki ïing ki sem: RS Mawkhar

Shillong, Risaw 12: Na ka daw ka jingbym shongshngaiñ ka nongbah Shillong na ki jingjia bapher bapher, khamtam ka jingshah dkhat jubor ka jingim jong ki hep kiba rit ha kine ki por ba la leit, na ka liang ka Dorbar Shnong Mawkhar ka la kyntu ïa baroh ki nongshong shnong ba kin long kiba peitngor bha bad kiba peit pyrman ïa la ki jong ki ïing ki sem bad khamtam eh ïa la ki khun ki kti.
Ïa kane la ïathuh da u Rangbah Shnong ka Dorbar Shnong Mawkhar u Bah Ransom Sutnga haba ai jingkren kum u kongsan hapoh ka tamasa ïadie ja die sha ha Khasi National Dorbar Hall ne ka Carnival 2025 ba la pynlong da ka Seng Kynthei Mawkhar Welfare Organisation na ka bynta ban pynmih pisa ïa ka skul Lasara Play School kaba don mynta kumba 18 ngut ki khynnah skul, iwei i nonghikai bad iwei i helper.
U la ong, “Haba la ïohi ïa ki jingjia ba sngewsih khamtam eh ka jingshah pynïap ki heprit, kum ka Dorbar Shnong, ka kyntu ïa ka Seng Kynthei, ka Seng Samla, ka Sports Club bad ki nongshong shnong ba kin long kiba peit pyrman bad peitngor bha. Na ka liang ka Dorbar Shnong ka la pynkhlaiñ ïa ki kor ban peit pyrman hadien ba ka Shillong Municipal Board ka la aiti ïa 5 tylli ki CCTV kiba la pyndait ruh naduh ka St. Dominic Savio Higher Secondary school bad ka shnong mynta ka la don sa 2 tylli ki control room. Ngi la buh ruh ïa ki CCTV hapoh ka skul Lasara bad hajan baroh ki jaka ka shnong ban long ka jingshngaiñ ïa ka skul bad kumjuh ruh ïa ka shnong baroh kawei.”
Haba phai pat sha ka tamasa Carnival 2025 la pynïaid ïa ka prokram da ka Secretary ka Seng Kynthei ka Kong Doly Lymba, ha ka jingdonlang ka President ka Kong Stela War. Ha kane ka Tamasa la wan ban die ïa ki bam na ki 7 tylli ki block ka Dorbar Shnong, ba kynthup ïa ka bam Khasi, ka dukan khwai, nangta ka ja sdieh, ka doh syiar bad dukan sha bad kiwei kiwei ki dukan bam bapher bapher.
Haba kren pat halor kane ka tamasa ïadie jingbam, u Bah Ransom u la pynpaw ka jingsngewtynnad ba ka Seng Kynthei ka la pynlong ïa kane ka prokram na ka bynta ban pynmih pisa ïa ka skul.
“Phi don ïa ka phang ne ka jingthmu bad ka thong kaba ong ban ïaid shakhmat na ka bynta ka lawei kaba bha, kane kan pynlong ïaphi ba phin ïaid shakhmat ban pyntyllun ïa ki kam kiba bha jong ka lawei, namar lyngba kane, kiba bun kin ïohi ba ka Mawkhar, naduh ka Dorbar Shnong, ka Seng Kynthei, ka Seng Samla, ka Sports Club ba ka don ka jingïatylli,” pynpaw u Bah Sutnga.
U la ïathuh ruh ba ka Mawkhar kadei ka shnong kaba don ki briew kiba bha ka jinglong, kiba shemphang nalor ki briew kiba la kham ïar ka jingmut jingpyrkhat nalor kiwei ki jinglong.
“Ka Dorbar Shnong ka la rai ban ai beit ïa ka kti ka mon ka kti ka diang ban kyrshan ïa ka Seng Kynthei. Ka Dorbar Shnong kan kyrshan ïa ka jingdonkam jong ka skul bad kaba donkam ka long ba ka Seng Kynthei kadei ban ai ïa ka jingmang tyngka ne budget. Lada phi don kino kino ki project pyntip sha ka Dorbar Shnong. Watla phi la kynduh ïa u Myntri Rangbah ka jylla u Conrad Sangma ha u bnai ba la dep ban aiti ïa ka proposal na ka bynta ka jingïarap pisa (fund) bad kaba la khmih lynti ruh ba kan sa poi bad ïoh, kumta kumjuh ruh lada phi aiti ïa ka mang tyngka (Budget) jong ka Seng sha ka Dorbar Shnong kan ai beit ka jingkyrshan,” kular u Bah Sutnga.
Ha kane ka sngi na ka liang ka Seng Kynthei ka la pynkupburom ïa u Rangbah Shnong da kaba ai ïa ka momento kum ka dak ka jingburom ïa ki kam ba bha ba u Bah Sutnga u la ju ïarap manla ka por sha ka Seng bad na ka liang u Bah Sutnga u la ai ruh ka jingïarap pisa sha ka Seng kaba la pynlong ïa kane ka tamasa da kaba noh synniang kumba T. 25 hajar ka ban long ruh kum ka jingïarap sha ka skul Lasara. Ha kane ka sngi u Rangbah Shnong u la plie ruh ïa kane Carnival 2025 ha ka jingïashim bynta jong kiba bun ki nongshong shnong.