Shillong, Nailur 01 : Ki Pulit ka Meghalaya ki la pynlong ka jingpeitngor kaba jur haba ïadei bad ka jingshah kem bun ngut ki lehnoh Jihadi ha Assam.
Haba kren bad ki lad pathai khubor ha kane ka sngi Palei, u Director General of Police, u LR Bishnoi u la ong, “Hadien ba ngi la ïoh pdiang ïa kitei ki jingtip shaphang ka jingdon lehnoh Jihadi ha Assam ngi la phah peitngor ha baroh ki district polict station bad ruh ki outpost khamtam eh kito kiba don ha khappud bad ka Bangladesh.”
Nalorkata, u ong ruh ba ki la phah peitngor wat ïa ki kam ba ju leh da kitei ki jait kynhun.
Lah ban kdew hangne ba ka Meghalaya ka ïa sam haduh kumba 434 kilometer u pud u sam bad ka Bangladesh bad kumta na ka liang ka tnad pulit ki la pynlong ka jingpeitngor kaba jur bha.
Lah ban kdew hangne ba ka ka sorkar Assam, ka la ïakren sani bha halor ka jingkylla ka rukom shong rukom sah bad ka jingkylla ki jaka shnong ki briew lane kata ka demographic change ha Assam.
Ki bor syntiat ka jylla ki la pynpaw ruh ba ki Jihadi ki lah ban rung ruh sha Meghalaya namar ba kane ka jylla ka la ïajan bha bad ka Assam bad kadei ka lynti kaba ki lehnoh ki ju ïaid lynti bha ban leit sha Bangladesh.
