Ba iehnoh khongreng u kontractor, byrngem ka Synjuk ban shimti biang ïa ka jaka ba tei ïa ka Polytechnic ha Nongkhrah

Nongpoh, Naitung 25: Ka Synjuk ki Rangbah Shnong Nongkhrah-Nonglyngdoh ha Ri Bhoi mynta ka sngi ki la byrngem syndon ban shiti biang ïa ka jaka ba ki la ai ei sha ka sorkar na ka bynta ban tei ïa ka skulbah Polytechnic ha Nongpoh, kaba dei hadien ba ka sorkar la bun snem mynta kam shym la lah ban pyndep kumba la thmu ban pynlong ïa kata ka shlem ai jinghikai na ka bynta ki samla ka Ri Bhoi District.
Kane ka jngshim rai ka Synjuk Ki Rangbah Shnong Nongkhrah-Nonglyngdoh ban shimti biang ïa katei ka jaka, ka dei ruh hadien ba mynta ka sngi ki la wan ban jurip ïa katei ka jaka bad la lap ba ka jingtei ïa ka skul Polytechnic ha Nongkhrah ka ka shah iehnoh khongreng ha u Contractor uba klem da lah shuh ban pyndep bad ym lah ruh ban tip na kaei ka daw ba um shem la pyndep ïa katei ka jingtei ba ïa ka jaka la ai sngewbha sha ka sorkar da ka Raid Nongkhrah bad ka Raid Nonglyngdoh ryngkat ki shnong na katei ka thaiñ.
Halor kane ka jingiehnoh khonreng u Contractor khlem da pyndep ïa katei ka jingtei ban pynlong kum ka skul Polytechnic, ka synjuk ki Rangbah Shnong Nongkhrah-Nonglyngdoh mynta ka sngi ha ka jingïalam u Chairman, u Bah L.S Pamshong bad la sakhi lang ruh da ka jingdon lang u Secretary, u Bah Cyril Maring, u Rangbah shnong ka Nongkhrah, u Bah Celestine Syngkli, u Lyngdoh ka Raid Nonglyngdoh, u Bah Senzy Lyngdoh, u President ka Seng Samla Nongkhrah-Nonglyngdoh, u bah Lawrence Lyngdoh lem bad kiwei ki nongïalam ki la wan ban jurip mynta ka sngi bad ki la pynpaw ruh ba ki dap da ka mynsiem jong ka jingsngewkhia halor ka jingsahkut katei ka jingtei ba la kot mynta la lai bad saw snme tam.
Kitei ki nongïalam ki la pynpaw ba ha ka jingshisha ki la kloi ban ai ïa ka jaka khlem da siew dor da ka sorkar ka long ban myntoi ki paidbah bad khamtam ki samla kiba pyntbid ha ki kam bapher bapher lyngba ka jingdon katei ka Polytechnic, hynrei ka long pat da khongpong ba ka sorkar haduh mynta kam shym la lah ban pyndep bad la shu iehnoh jyndat da u Contractor ba ka jingai ei ïa ka jaka kam don jingmut satia.
Kitei ki noingïalam ki la pynpaw ruh ha ka jingshisha kum ki nongïalam ki khmih lynti ba kane ka skul Polytechnic kan ai jingmyntoi ïa ki khun samla ka dong Ri Bhoi da kaba ki la kloi ban ai ei wat ïa jaka ba ka sorkar kam donkam ban siew dor, hynrei phew se kane ka long da mar khongpong ha kane ka jingtei ka la kylla pynban kum ka jaka rieh tngen ki riew sniew bad ban leh ïa ki kam sniew na ka daw ba haduh mynta ka sorkar kam shym la lah ban pyndep kumba ka dei ban long ban myntoi ki khun samla.
Namar kata, kitei ki nongïalam ka synjuk ki la phah da ka khubor kaba shai sha ka sorkar ba lada ka sorkar ka dang iehnoh khongreng ïa kane ka jingtei khlem da pyndep kum ka synjuk lem bad ki shnong kin shim biang noh ïa ka jaka sha ka shnong bad ka raid, namar kam dong jingmut ban shu ai jaka sha ka sorkar lada ïa kaei kaba ka thmu ban leh kam lah ban pyndep kumba ka dei ban long, ki la bynrap.
Ha kajuh ka por, ka synjuk mynta ka sngi ka la leit aiti ruh ïa ka dorkhas sha u Deputy Commissioner ka Ri Bhoi, u Arpit Upadhyay ban kyrpad ïa u ba un tuklar sha ka sorkar jylla bad lada kane ka jingkyrpad ka synjuk kam urlong kum ka synjuk lem bad ki shnong kim banse ban shim biang noh ïa katei ka jaka ban pyndonkam biang katkum ki jingdonkam jong ka shnong, la bynrap kitei ki nongïalam ka Synjuk.