Nongpoh, Naitung 04: Kum ka bor shnong kaba peit ba khmih na ka bynta ka bha ka miat jong ki paidbah ha shnong ha thaw bad ruh ban peit na ka bynta ka jingmyntoi ki nongshong shnong mynta ka sngi ka la pynpaw ïa ka jingsngewkhia halor ka jingshah iehnoh ka jingpyntrei ïa ka Polytechnic Project kaba u Contractor u la shu pynsahkut ïa ka kam khlem da pyndep mynta la kumba 5 snem ei ei.
Halor kane ka jingpynsahkut khongreng ïa ka kam khlem da pyndep kumba la thmu da ka sorkar, ka Shnong Nongkhrah mynta ka sngi ha ka jingïalam u Rangbah Shnong, u bah Celestine Syngkli ki la leit ban jurip ïa katei ka jingtei na ka bynta ka Polytechnic bad la shem ba kane ka Polytechnic Project ka la shu sahkut khongreng khlem da pyndep da u Contractor.
Haba leit ban jurip da u Rangbah shnong la sakhi lang ruh da ka jingdon lang u Secretary Shnong, u Samla Pyndapbiang John Lyngdoh bad u Bah Min Makri uba dei uwei na u riew rangbah ka thain uba la shim khia ban wan rah ïa kane ka project da ka jingthmu ban myntoi ki paidbah ka thaiñ.
Kane ka jingleit jurip jong ka shnong ka dei ruh hadien ba ki la lap ba u Contractor mynta la bun snem u khlem pyntrei shuh ïa ka kam bad u la shu iehnoh khongreng ïa ka kam khlem da pyndep kumba la thmu da ka sorkar ban wan rah ïa kane ka project na ka bynta ban myntoi ki khun samla ka dong Ri Bhoi.
Kum ban pynkynmaw, kane ka project ban shna ïa ka skulbah ba la tip kum ka Polytechnic la sdang naduh u snem 2018 ha kaba la kumno kumno dei ban pyndep tang hapoh 24 bnai bad ka mang tyngka la mang kumba T. 7 klur bad la ha ka jingsdang ïa ka kam (First phase) la mang T. 2 klur bad kum ka bor shnong ka sngewlyngngoh pat ka ei ka daw kaba la pynlong ïa u Contractor ba un sangeh noh ïa ka kam khlem da pyndep thikna kumba la mut la mang ban wan rah ïa katei ka shlem pule ki samla ka dong Ri Bhoi.
Kum ka bor shnong bad u riew rangbah, haba leit ban jurip mynta ka sngi ïa katei ka jingtei, u Bah Celestine Lyngdoh, Rangbah Shnong bad u Bah Min Makri ki la pynpaw ka jingsngewdiaw ban iohi ba katei ka jingtei ïa ka Polytechnic ka la shah iehnoh khongreng ha u Contractor bad haba leit ruh ban jurip la lap ba katei ka jaka ka la long pynban ka ktem ba ki riew sniew kin shim kabu ban leh ïa ki kam sniew kaba long pynban ka jingma ïa ka shnong ka thaw.
Na ka liang kitei ki rangbah ki la dawa na ka sorkar bad kumjuh ruh na u Contractor ba dei ban pynsted noh ïa kane ka kam na ka bynta ban pyndep ïa katei ka jingtei kumba la mang da ka sorkar bad ki la pynpaw ruh ka jingsngewdiaw ba lada ka sorkar kam lah ba pyndep kam don jingmut ba ïa katei ka jaka la shu ai ei khlem da siew dor ïa ka sorkar b akum ki nongïalam shnong ki khmih lynti ba ka jingwan kane ka shlem pule kan ai jingmyntoi ïa ki khun samla ka shnong bad ha ka District hi baroh kawei.
