Nongpoh, Nailur 11: Kiba bun ki nongri sñiang ha Ri Bhoi ki la pynpaw ka jingbynñiaw kaba khraw, kaba dei hadien ba ki don ki sñiang jong ki, kiba la heh la san ki la shu ïap kynsan bad kane ka jingïap kynsan ki sñiang ka la pynduhnong bha ïa ki nongri sniang.
Kum ban pynpaw, ha kine ki sngi la don ka jingpynpaw paidbah ha ki lad pathai khubor, ba ki la don ki jylla hapoh ka thaiñ Shatei Lam Mihngi kum ka Jylla Mizoram ki la don ki sñiang kiba ïap na ka jingktah ka jingpang ba la tip kum ka African Swine Fever bad kane ka jingïap ki sñiang na katei ka jingpang ka la pynsuba ruh ïa ki nongri sñiang ha Ri Bhoi ba ioh lehse ka jingïap jong ki sñiang kiba ki ri ka lah ban dei na katei ka jingpang.
Kumba la ioh lum jingtip da u Nongthoh Khubor, la ong ba la don ki nongri sñiang ha Ri Bhoi kiba la mad ïa ka jingduhnong kaba khraw, kaba dei na ka daw ka jingïap kynsan jong ki sniang ba ki ri bad kane ka la pynlyngngoh ruh ba ki sñiang ba la ïap ruh ki dei kiba la heh la san bad la dei ka por ba kin ioh nong bad ban die noh ïaki hynrei ka jingïap kynsan ki sñiang pat ka la pynpulom noh ïa ka jingtrei shitom jong ki ban ri ban sumar ïa ki sñiang na ka bynta ban ioh jingmyntoi wat hadien ba kila pynlut shibun ka pisa naduh ka bam bad ki dawai.
La don ruh ki nongri sñiang kiba la ong ba ym myntoi ban ri sniang lada ka long ha kane ka rukom, namar da la dei ka por ban ioh jingmyntoi noh bad ha kata ka por la shu ïap kysan bad kane ka la pynduhnong bha ïa ki.
Haba kylli, katno phin ioh jingmyntoi lada phi la die ïa u sñiang ba la heh la san bad uba la ïap noh, ka jubab kaba ki la pyntip ka long ba lada ngi la ioh ban die kaba rit tam kaba ki ioh nong kan long kumba 25 hajar uwei u sñiang. Ki la don ki sñiang kiba la heh ki shu ïap kynsan bad kane ka dei ka jingduhnong kaba khraw ïa ki kum kita ki nongri sñiang, ong uwei na u nongri sñiang na Ri Bhoi.
