Ba hiar dor palat u piskot, yn lum jingïalang paidbah ka HFU ha Mawthawpdah

Mawkyrwat, ‘Nailur 23: Ka Hill Farmer’s Union (HFU) jong ka South West Khasi Hills District kan pynlong ïa ka jingïalang paidbah ban ïa kren halor ka jinghiar dor u mar rep kata u piskot ha ka 26 tarik u bnai ‘Nailur, 2024 ha ka por 7:30 mynstep ha madan skul Mawthawpdah, South West Khasi Hills District.
Ha ka kyrwoh khubor na u President jong ka HFU jong ka South West Khasi Hills, u bah Pynhunborlang Iawphniaw u la ïathuh ba na ka liang jong ki nongrep ki la ïakynduh jingeh halor ka jinghiar dor jong u piskot haduh ba ki nongrep kim sngewmyntoi shuh ban die namar ka jinghiar dor shaba palat.
U bah pynhun u la pyntip ruh ba ha katei ka sngi nalor ki nongïalam ka seng, yn wan ban ïashim bynta ruh u President Rangbah duh jong ka HFU, u bah Commander Shangpliang.
Namarkata, la kyntu ïa baroh ki nongrep ba kin ïamih tylli lang ha katei ka sngi ban pyni ïa ka jingïatylli, khamtam ban pynsngew sha ka sorkar halor kane ka jinghiar dor. “Ka jingbun paid bad ka jingïatylli kan long ka bor, kumta dei ban mih paidbah”, la pynkut u bah Pynhunborlang Iawphniaw, President ka HFU, South West Khasi Hills District, Mawkyrwat.