Shillong, Rymphang, 18: Ki nongrep ka War Jaiñtia kiba don hapoh ka shatri jong ka Seng Nongrep War Jaiñtia, Amlarem, West Jaiñtia Hills dang shen ki la pynsngew sha u Myntri Rangbah ka Jylla u Conrad K. Sangma ban wad ïa ki lad ki lynti halor ka jinghiar dor jong ki mar rep kaba la buh jingeh haduh katta katta ïa ki nongrep kiba sah ha thaiñ Amlarem kaba don markhap bad ka ri Bangladesh.
Ha ka dorkhas ba la aiti sha u Myntri Rangbah ba la soi da u President Bah Kolmen Pohshna bad u Secretary Bah Sumer Syngkor, ki la pynpaw ba ki mar rep ba ki paidbah ka War Jaiñtia ki rep bha ïa u synshar, u kwai, u tympew hynrei mynta ki ïakynduh mawsiang na ka daw ka jinghiar dor kynsan jong kine ki mar rep ha iew ha hat kat haduh ba ki nongrep ki la ïakynduh jingeh ban pyndap ïa ka iing ka sem.
“Ngi kyntu ïa phi ban peit lem ïa kine ki jingeh jong ki nongrep bad ban buh ïa ka dor die kaba kham heh haba die ïa u synsar, u kwai bad u tympew ha iew ha hat kiba don hapoh u pud u sam jong ka thaiñ Amlarem bad sha kiwei kiwei ki jaka,” ong kine ki nongïalam ka seng ki nongrep.
“Ki paidbah ka ri War Jaiñtia, kumba 80 na ka 100 ki dei ki nongrep kiba ju rep bha tang ïa u synsar, kwai bad u tympew naduh ki por hyndai bad haduh mynta ki dang shaniah beit ha kine ki mar rep na ka bynta ka kam kamai jakpoh ban pyndap ïa la ka ing ka sem,” la bynrap ka seng.
Shuh shuh ka Seng ka la pynsngew ha u Myntri Rangbah ba un kyntu ïa ka tnat Forest kaba buh ïa ka khyrdop khrong khajna ha ka shnong Mookyndur ba kan ym oh khajna na ki kali kiba kit ïa ki mar rep na War Jaiñtia ban wan kit sha nongbah Shillong bad kumjuh ruh ïa ka Jaiñtia Hills Autonomous District Council (JHADC) namarba ka jingsiew khajna ki nongrep lyngba kine ki khyrdop ka ktah ïa ka ïoh ka kot jong ki nongrep.
