Ba hap thied snam nabar jylla kiba thiah pang ha Bethany Nongpoh, leit ïakren ka HNYF bad KSU
Nongpoh, Nailur 29: Namar ka jingeh ba mad da ki paidbah ki shnong bapher bapher kiba leit ban thiah pang ha Bethany Hospital Nongpoh ha kaba ïadei bad ka jingioh ïaka snam ba katei ka Hospital ka phah thied beit ïaka snam na Guwhati watla ka don ka Blood Bank ha Nongpoh Civil Hospital, ki nongïalam ka HNYF bad KSU Nongpoh Circle mynta ka sngi kila leit ban ïakren syndon bad ki bor pynïaid jong ka Bethany Hospital Nongpoh naka bynta ban lap bad tip ïaka daw ka jingphah shim snam nabar jylla lada ki nongpang ki donkam snam.
Naka liang kitei ki 2 seng hapoh ka jingïalam u Bah Marcus Marten President ka HNYF Northern Region, Samla John Lyngdoh President ka KSU Nongpoh Circle bad kiwei kiwei ki nongïalam mynta ka sngi kila leit ban ïakynduh ïa u Dr CM Pohshna Medical Superintendent ka Bethany Hospital Nongpoh ban lap ïaka daw bad ka jingeh ba ki paidbah ki mad naka por sha ka por.
Katei ka jingleit kynduh ki nongïalam seng ka dei ruh hadien ba bun naki kynhun sengbhalang, ki riew shimet ki ju leit ban noh synñiang ïala ka jong ka snam ha Blood Bank jong ka Civil Hospital Nongpoh naka bynta ban pynsuk ïaki paidbah kiba donkam snam khamtam kiba donkam kyrkieh ïaka snam, hynrei kaba lyngngoh ka long ba katei ka jaka sumar ka ju phah ïa kiba thiah pang ha katei ka jaka ba ki dei ban thied ïaka snam na Assam haka dor kaba rem.
Naka liang kitei ki nongïalam seng hadien ka jingleit kynduh ban ioh jingshai kila lap pynban ba ka daw bala pynlong ïa katei ka Hospital ban phah thied snam na shabar ka dei namar baka Civil Hospital ha Nongpoh kam pat lah ban ai ïaka snam kaba khuid bad kaba la jar bha kaba la long thikna ban ai sha ki nongpang bad kiba donkam snam kumba katei ka Hospital ka kwah ban ai ka jingsumar kaba paka tam naka bynta ki paidbah.
Halor katei ka bynta naka liang ki nongïalam ka KSU bad HNYF kila buh ka jingkyntu sha ka sorkar ba ka dei ban lehbha bad pynbha shuh shuh ïaka Blood Bank ha Civil Hospital Nongpoh ban buh ruh ki tiar kiba biang kiba lah ban test ïaka snam, khnang ba katei ka Blood Bank ha Nongpoh Civil Hospital kan lah ban ai ka jingshakri ïaki paidbah kiba donkam kyrkieh ïaka snam bad ba kin nym mad jingeh ha kaba ïadei bad ka jingioh ïaka snam bad kumjuh ban pynduna ïaka jinglut.