Shillong, ïaïong, 22: U MDC jong ka Sohra Constituency u Bah Titos W Chyne, uba dei ruh u Chief Executive Member (CEM) jong ka Khasi Hills Autonomous District Council (KHADC) ha ka sngi Thohdieng u la kyntu ïa ka tnat PHE ba kan tuklar lem halor ka jingduh umbam jong ki paidbah nongshong lyngba ka Greater Sohra Water Supply Scheme (GSWSS).
Katkum ka jingud jong ki paidbah lyngba ki nongïalam shnong kiba dei ban ïoh myntoi ïa ka umbam na kane ka skhim sha u Bah Titos, la ong na ka daw ka jingpynkhuid ïa ki pipe um ba la set jaboh mynta la shi taïew tam ki nongshong shnong kim shym la ïoh satia ïa ka umbam bad ka jingtrei ka long kaba suki shaba palat ban pynkhuid ïa ki pipe um.
Na ka liang ka ophis jong u Executive Engineer, PHE Sohra Division u la phah jingthoh sha ka M/s BAC Infiatech Private Limited kaba pyntrei ïa ka Greater Sohra WSS ha kaba ka jingmaramot ruh kan dei jong kane ka Company. Ka ophis ka la pyntip ba ka jingjaboh ha ki pipe um ka la ktah ïa ka jingpynpoi umbam sha ki shnong kiba don ha ka thaiñ Sohra baroh kawei.
