Nongpoh, Nohprah 11: Na ka daw ka jingshah pynduh ticket ha kane ka election MDC kum u sitting MDC na Jirang Constituency na ka party NPP, u Bah Victor Rani kum u MDC ka Jirang ryngkat bad ki nongialam mynta ka sngi ki la pyniasoh noh sha ka party Congress ban pan ticket na ka bynta ban ia khun ia ka election ban sa wan jong ka MDC na Jirang Constituency.
U Bah Victor Rani kum u MDC ka Jirang ryngkat kiwei ki nongialam bad ki nongkyrshan ki la leit ban pyniasoh sha Congress party ha ka jingialang kaba la long mynta ka sngi ha phyllaw ka Dorbar Hall Byrnihat proper, ba ki nongialam ka Party Congress ha ka jingialam u Bah M.G Kharshanlor kum u President ka Ri Bhoi District Congress Committee lem bad kiwei ki nongialam ki la pdiang burom ia u Bah Victor Rani lem bad kiwei ki nongialam sha ka sem jong ka party Congress.
Kiwei kiwei kiba la ia don lang ha kane ka sngi ki kynthup ia u u Vice President ka RBDCC, u Bah Rocky A. Marwein, u Bah Phrangsngi Syngkli, President ka Jirang block Committee, u Bah Ardrian Chyne Mylliemngap, u President ka MPYC lem bad kiwei kiwei ki nongialam ka Congress bad kiwei ki nongkyrshan kiba la ai ka jingkyrshan kaba pura ia ki Bah Victor Rani.
Haba kren ha kane ka jingialang, u Bah Victor Rani u la ong ka daw kaba la pynlong ia u ban phet noh na ka NPP party, ka dei ka jingshah pynduh ticket ha kane ka election MDC na Jirang Constituency bad u la iathuh ruh ha ka jingshisha naduh mynshuwa u don hapoh ka sem jong ka party Congress, hynrei dei tang ka jingmih ka jingpher jingmut naduh u snem 2016 ba shah sospon u Bah P.N Syiem ha ka MPCC ba u la mih noh na ka party Congress ban pyniasoh sha ka NPP ha u snem 2018 ban kyrshan radbah ia u Bah Sosthenes Sohtun uba ia khun na ka party NPP ha ka election MLA kaba u la ioh ia ka jingjop kaba don burom.
U la ong ruh ha ka jingshisha um don jingmut satia ban mih na ka party Congress ha kitei ki snem bad dei ka jingpynduh ticket ka Congress ruh ha u snem 2008 ia u Bah J.D Rymbai ha ka election MLA kaba u la mih na katei ka party Congress bad mynta pat u la hap ban wan phai biang sha ka party Congress kaba dei pat hadien ka jingshah pynduh ticket ha ka party NPP na Jirang Constituency.
Shuh shuh, u la ong ruh ha kane ka kynti la long kumba ioh tdong bsein halor ka jingshah pynduh ticket ha ka party NPP wat la u dei u sitting MDC bad ka daw kaba u la shah pynduh ticket ka dei ka jingleh ki nongialam ryngkat u MLA, kiba la pynsniew bad pynshoi sha ki nongialam ka NPP kynthup wat ia u President ka State NPP kaba u la duh syndon ia ka ticket bad halor kitei ki nongrim u la hap ban mih noh na ka party NPP ban rung noh sha ka Congress ban pan ticket ha kaba lada ka party Congress ka ibit un sa mih ban aireng bad ban pynkhlaiñ na ka bynta ka jingjop don burom ka party Congress ha kane ka election MDC na Jirang Constituency, u la bynrap.
