Ba duh noh ki kmie ki kpa na ka khlam COVID, ïoh jingmyntoi 2 ngut ki heprit ha Ri-Bhoi District

Nongpoh, Jymmang 31: 2 ngut ki heprit na Ri-Bhoi District ba kynthup ïa I Baphindaburom Shylla ba dang pule class VII bad u Hambert Sohphoh ba dang pule Class VI kiba dei naka shnong Umbir ha Ri-Bhoi kiba dei ruh ki heprit kiba la duh noh ïala ki kmie ki kpa naka jingwan lyngshop jong ka khlam Covid-19,kila ioh jingmyntoi naka skhim PM-CARES hadien ba ka ophis u Deputy Commissioner ka Ri-Bhoi ryngkat bad ka ophis jong ka District Child Protection Officer, District Child Protection Unit, ICPS haka sngi nyngkong kila shim bynta haka jingpynlait ïaka skhim PM CARES da u Myntri Rangbah duh ka Ri u Narendra Modi lyngba ka Video Conference.
Ïa katei ka skhim la pynlait paidbah ruh da u Narendra Modi haka 29 tarik, Jymmang, 2021 kaba dei ka skhim kyrpang naka bynta kito ki khynnah kiba la duh noh ïala ki kmie ki kpa bad ki nongsumar jong ki haka por ba wan lyngshop ka khlam Covid-19 kata naduh ka 11 tarik Lber 2020 haduh ka 28 tarik Rymphang 2022.
Ka thong bad ka jingangnud jong katei ka skhim ka long ban kyrshan bad ai ka jingïada bad ïarap ïaki khynnah haka rukom kaba dei ba kin nym duh ïaka hok ba ki dei ban ioh kum ki khynnah naduh ka koit ka khiah, ki jingïarap pisa naka bynta ka pule ka puthi ka jaka sah ka bam ka dih ka jong ki haduh ba kin da dap 23 snem ba kin bteng ruh ïaki jingpule ba kham shalor.
Lyngba katei ka skhim bala pynbna paidbah da u Narendra Modi, kitei ki heprit kin ioh shibun ki jingmyntoi, bad ki jingsumar ba ki dei ban ioh katkum ka hok ka jong ki bala aiti ruh ha katei ka sngi ïaki kot ki sla haka jingïalang kaba la long ha Conference Hall jong ka ophis u Deputy Commissioner ka Ri-Bhoi District bad ha katei ka sngi naka liang u Myntri Rangbah duh ka Ri u Narendra Modi u la pynbna ruh ba la pynlait ïaka baibam (scholarship) lyngba katei ka skhim.