Ba dap um ka surok ha Lumshnong, byrngem ka KSU Narpuh ban khang tala ïa ka Toll Gate

Khliehriat Iaiong 13: Ka jingdap um ka surok bah national highway ha Lumshnong bad ha Kuliang ka la buh jingeh haduh katta katta ïa ki nongleit nongwan, ka Khasi Students Union Narpuh Circle ka byrngem ban leit khang tala noh ïa ka jaka lum khajna ka NHAI ha Lumshnong lada kam leh eiei halor kane.
Ka seng ka kynnoh ruh ba ka NHAI ka la shu sngap mynthi khlem da leh eiei ïa ka jingdap um ka surok ha Lumshnong kaba ju jia khah khah tang shu hap u slap, kane ka buh jingeh khamtam ïa ki kali rit bad lap ruh ba ki don bun ki kali rit kiba iaid lyngba na ka surok ba dap um ki la sniew, imat ka um ka la ioh rung shapoh bad pynsniew noh ïa ka engine bad ki tiar kali.
“Ka jingleit khang khyrdep shipor ïa katei ka jaka khrong khajna ka long ban pynpei shkor ïa ka sorkar bad ïa ka NHAI namar ka jinglong kuman jong ki. Ki paidbah ki mad jingeh ha ka leit ka wan ha kaba ki hap ban iaid lyngba katei ka surok kaba la dap um, kaba i sangsot eh ka long ïa kito ki kali kiba kit nongpang. Hooid ym lah ban len ba ka jingjur slap ka long shaba palat, hynrei pat ka dei ka kamram jong ka NHAI ban pynbha namar ïa ka surok la shimti ka NHAI” ong u kyrwoh na u Organising Secretary KSU Narpuh, u samla Skhemlang Lapasam
La ong ruh ba ka seng kan ai por tang shi sngi ïa ka NHAI ban pynkhuid ïa ka um kaba lang ha surokbah ha Lumshnong bad kumjuh ruh ha Kuliang bad kumjuh ruh ban shna bha ïa ki nala tuid um kiba biang ha baroh shilynter ka surok bah namar kumba long mynta ka surok ha baroh shilynter ka la sdang ban jot ban julor kata ruh tang 6 bnai ym pat don ka jingmaramot, la kynnoh ba kane ka dei namar ka jingtrei thulmur tang dep rukom.
Ka seng kam banse ban shim ïa kane ka mat namar lada ka seng kan sngap mynthi, ka jingeh kan long ïa ki paidbah ba lui lui, pynkut u kyrwoh na ka seng.