Ba dang duh klas ki samla pule, leit kynduh ki ar seng ïa u Principal ka Kiang Nangbah College

Jowai, Naitung 30: Ki ar tylli ki seng bhalang napoh ka Ri-Lum Jaiñtia kita ka Jaiñtia Student Movement (JSM) Western Region bad ka Jaiñtia Youth Federation (JYF) Jowai Circle hynnin ka sngi ki dkhot ka seng kila leit ban ïakynduh ïa u i/c Principal jong ka Govt Kiang Nangbah Higher Secondary School hadien ka jingïoh ujor ba dang don ki samla pule kiba dang duh klas haduh mynta.
La ïathuh da ka seng katkum capacity ban pdiang ïa ki samla pule hapoh katei ka jaka pule ka la dap haduh 350 ngut bad kan long kaba khapngiah bha ka jaka shong lada dang bteng ka jingpynrung klas nalor ka jingrit jong ka Class Room.
Halor kane ka seng ka kyntu ïa ki khun samla kiba dang duh class ba kin pyntip saka seng JSM bad JYF khnang ba kin pyrshang ban leit ïakren bad kiwei pat ki jaka pule hapoh ka Rilum Jaiñtia ong u samla Ribok Biam President ka JSM, ula kynthoh jur ïa ka sorkar da kaba buh jingkylli balei ïa ki nong Jaiñtia ka sorkar ka la shah ibeiñ haduh katne lada nujor bad kiwei pat ki District.
Da kaba ula pynsngew ba kane ka jingduh klas ki samla pule ha Ri-Lum Jaiñtia ka la shait jia manla u snem haduh ba la pynbor ïa ki dkhot ka seng ban mih surok kum ha kine ki snem bala dep, kumta kala dawa ban don kawei ka Govt College hapoh East Jaiñtia Hill District khnang ba kan jah noh kane ka jingeh manla u snem.
Naka liang ki ar seng kila dawa na ka sorkar ba kan shimkhia mardor ïa kane ka bynta ba kongsan jong ka pule puthi jong ki khun samla ka District bad ka jylla hi baroh kawei.