Nongstoiñ, Nailar, 17: Watla ka election ban jied ïa ki nongmihkhmat sha ka Ïingdorbar Thawaiñ ka jylla ka dang shim por sa hynñew bnai tam, hynrei ha ki ar tylli ki Constituency ha West Khasi Hills kata ka Nongstoiñ bad Mawshynrut kiba ka ka ka All India Trinamool Congress, ka la dep pynskhem ïa ki nongïalam bad ki dkhot ki ban trei na ka bynta ban pynkhlaiñ ha ka election ka ban long ha u snem ban wan, ka la pynkhluid tar ïa ki paitbah namar ki nongïalam ba ha khmat duh kata ki president jong ki Block Committee, ki la long lypa ki kyrtong ki ban ïakhun ha ka election.
Katkum ki dak ki shin kiba paw ha ki jingïalang paitbah ha Mawthengkut ha ka 12 tarik ka pyni shai kdar ba ka AITC ha katei ka constituency ka khlaiñ bha, namar ki ba pynrung kyrteng ha katei ka sngi kata naduh ki samla, ki longkmie bad ki rangbah ka la poi sha ka ar hajar ngut tam kata ruh tang haduh ka por ba la sdang ïa ka jingïalang, hynrei wat haduh shuwa ban kut ka jingïalang ruh kiba pynrung kyrteng ki dang bun bha.
Haba pyrshang ban twad jingmut na ki ba bun ba lang kiba la wan ha katei ka jingïalang, hynrei ki bym shym pynrung kyrteng ha ka AITC, ki la ong ba lada u bah Justin G.Momin u kyrtong ka AITC un trei shitom naduh kine ki sngi, ka jingïaleh kan long beit hapdeng jong u bad u bah Methodius Dkhar u kyrtong ka HSPDP.
Haba kylli pat ba ha kano ka rukom ki sngewthuh ba ka jingïaleh kan long hapdeng u kyrtong ka AITC bad u kyrtong ka HSPDP, haba u bah Gigur Myrtong u ba long mynta u MLA ka Constituency u la wanrah shibun ki jingmyntoi ïa ki paitbah jong ka constituency kum ki surok, ki madan ïalehkai na ka bynta ki samla, ki skul bad kiwei kiwei ki kam pynroi kiba mynroi na ka bynta ki shnong ki thaw ki la ong ba kita ki dei ki jingshisha.
Hynrei kaba pynlyngngoh ka long ba lada leit pynlong jingïalang ha ki shnong, ki paitbah ki wan hi wat lada ym shym la khot ruh bad ki pynlut hi ïa ka bai leit bai wan da kaba ong ba ki kwah ïa ka jingkylla bad wat lada ki hap ban pynlut katno katne ruh kin trei shiom bad pynlut hi ban pynjop biang ïa u kyrtong ka HSPDP. Ka dei ruh ka jingtrei shitom jong ki nongkitkam kata naduh ki samla, ki longkmie bad ki rangbah kaba la pynlong ïa ki paitbah ba kin phai khmat sha u kyrtong jong ka party.
Kane ka jingiatan tyllai hapdeng ka TMC bad ka NPP kan pynkulmar jingmut ruh ia ki nongialam ka NPP ha Mawshynrut namarba ka lyer jong ka TMC naduh ba ka la sdang ban iuhkjat ha kane ka jylla Meghalaya ka la trei borbah ban rung sha ki kyndong kynshrot ban tip ia ka jinglong jingman.
