Jowai, Naitung 30: Ka Hynñiewtrep Integrated Territorial Organization (HITO) Thadlaskeiñ Area hapoh ka jingïalam u Firstborn Sumer Secretary hynnin ka sngi kila leit ban ai da ka dorkhast ha u Sub Divisional Officer ka MEPDCL halor ka jingshong synjor jong kiba bun ki sianar elektrik kiba ïaid lyngba ki tnum ïing jong ki nongshong shnong ka thaiñ Thadlaskeiñ bad kine ki sainar kila buh jingeh ïa kiba bun ba lang.
Ha ka juh ka por ka seng kala dawa kumjuh ruh ban bujli noh ïaki post elektrict kiba la jan khyllem bad na ka liang ka ophis jong u SDO lyngba u Junior Engineer kila kular ban shimkhia ïa kane, da kaba ban leit sorjamin ïakitei ki jaka ha kane ka taïew ban wan.
Naka liang ka seng ruh kala ai por shitaïew ïaka MEPDCL ban leh ïa kaba don kam khnang ban lait na kino kino ki jingma hadein bad ban wanrah ïaka jingshngaiñ jingsyier ïaki nongshong shnong.
Haka jingïakren bad u Junior Engineer ula pynsngew ha ki nongïalam ka seng ba yn shimkhia noh mardor ïa kane naka bynta bad ka jingshngaiñ jong u paidbah bad ula ong ruh ba ka jingleit sorjamin yn ïadon lang bad ki dkhot ka HITO Thadlaskeiñ Areas.
