Jowai, Naitung 28 : Ki nongïalam jong ka Khasi Students’ Union (KSU), West Jaiñtia Hills District Unit, ryngkat bad ka KSU Lapangap Unit, hapoh ka jingïalam jong u samla Laitphar Syngkrem President KSU-WJHDU, samla Leningard Tariang General Secretary KSU-WJHDU bad u samla S. Sumer President Lapangap Unit, mynta ka sngi 28.07.2025, kila leit aiti da ka jingthoh ha u Superintendent of Police West Jaiñtia Hills District u J.S Dhanoa (IPS), halor ka jingbteng jong ka jingshah pyndik ki nongrep ka thaiñ Lapangap na ka por sha ka por ha ki nong Karbi, ban kyntu ïa u SP ban buh ne phah a ki pulit pahara ha katei ka thaiñ.
Na ka liang ki nongïalam ka KSU, haba kren sha ki lad pathai khubor, kila ong ba ka jingïakyduh ïa u SP ka West Jaiñtia, ka long ban ai ka jingïada na ka bynta ki nongrep jong ka shnong Lapangap, ha kaba ki Karbi kila pyndonkam da ki khnam ki ryntieh bad ki jri ban siat sha ki nongrep jong ka Lapangap, kaba la jia naduh ka 25 u bnai June 2025.
Ka seng ka la pynpaw ruh ka jingsngewsih halor kane ka jingshah pyndik jong ki nongrep ka jylla ha ki nong Karbi, haba ki leit ban rep ban riang sha ki jaka rep ki jong ki. Ha kaba dang ha kane ka sngi Saitjaiñ la don ka jingsiat jri na ka liang ki nong Karbi bad sa kawei ruh ki Karbi ki juh jynrat ne phut ïa ki jingrep jingriang jong ki nongrep Lapangap.
Ki la ong ruh ba haduh mynta na ka liang ki briew jong ka Lapangap kim juh sdang ne leh ïa kano kano ka jingïa khajia, la ïathuh ruh ba ki nong Tahpat jong ka Karbi kiba la shait pynmih ki jinghuri hura na ka por sha ka por. Ka KSU ka la dawa ruh ia ki briew jong ka shong Tahpat ba kin sangeh ïa kane ka kam pyndik pynthut ka jong ki bad lada kim sangeh ka seng ruh kan wad da kiwei ki lad.
Kumta na ka liang ka KSU ka buh ka jingkyrpat ïa baroh ar ki sorkar jong ka Jylla Assam bad Meghalaya ban pynsangeh noh ïa kane ka jingïa khajia kaba la jia na ka por sha ka por naduh ki por kiba mynshwa.
Na ka liang ka KSU ka ha kane ka sngi Thodieng 25 tarik, ki la ïakynduh ruh ïa ki nongrep ka Lapangap bad wan lad wan lynti halor kane ka kam.
Ha ka jingïakren bad u SP, na ka liang ka KSU kala ong ba u SP ruh u don ka jingsngewkhia halor kane ka kam bad na ka liang jong u ruh, un wan ki lad ki lynti ban pynkloi noh ban buh ïa ki pulit sha katei ka jaka khnang ba ki briew jong ka thaiñ Lapangap bad ki shnong ba marjan kin ïoh ïa ka jingshngaiñ.
