Ba ap bus harud surok, kyntu ka GSU ïa ka NHIDCL ban shna jaka ap bus bad buh speed breaker

Shillong, Nohprah 08: Ka Garo Students’ Union (GSU) ka la kyrpad ïa ka National Highways & Infrastructure Development Corporation Limited (NHIDCL) ban shna ïa ki jaka ap bus ha Chitoktak (Agitok) bad Rongkhon, bad ban buh ïa ki speed breaker ha ka bynta jong ka surok kaba ha Rongkhon.
Ha ka shithi ba la phah sha u Managing Director ka NHIDCL ha ka sngi Nyngkong, ka GSU ka la ong ba ka jingbym don ki jaka ap bus ka la pynbor ïa ki khynnah pule bad ki briew kiba leit jingleit manla ka sngi ba kin hap ban ap kali ha ki rud surok khlem da ïoh ki lad jingïada ban rieh tngen, ha kaba ki la hap ban shah ïa ka jingbym bha jong ka jinglong ka suiñbneng bad ki jingma.
“Ka thaiñ Chitoktak (Agitok) bad Rongkhon ka ïaibteng ban long ka jaka ka bym don ki jaka ap bus ha kaba kane ka la pynbor ïa ki samla pule, kiba ïaid manla ka sngi ban ap kali harud surok khlem da ïoh kino kino ki lad jingïada ne jingïoh riehtngen,” pynpaw ka shithi.
Ka GSU ka la pynpaw ruh ïa ka jingma na ka jingbym lah tehlakam ïa ka jingïaid sted ki jaki ha ka thaiñ Rongkhon, khamtam hajan Don Bosco School bad ha Rongkhon Baptist Church.
“Ka jingbym don ka rukom pynïaid kali kaba lah ban pynjai jai ka la pynlong ïa kane ka thaiñ kaba ma, kyrpang ïa ki khynnah skul ba dangrit bad kiba ïaid kjat kham tam kiba ïaid na kane ka lynti,” pule shuh shuh ka shithi.
“Ngi kyntu ïa ka NHIDCL ba kan tei noh khlem da pynslem shuh, ïa ki jaka ap bus ha Chitoktak bad Rongkhon, bad ban shna ruh ïa ki speed breaker ha ki bynta jong ka surok Rongkhon,” ong ka GSU.